FANTUS的矛廁: 通訊自由的代價

到今時今日為止，有3個學者影響我至深：
1) 李天命
2) Richard Dawkins
3) Milton Friedman

關於Milton Friedman，其實只係佢講過既其中一句說話，就足以影響我：

"There's no such thing as a free lunch."

世界並無白吃的午餐

所有事情都有佢既代價，就連我地成日爭取既自由、民主都有佢既代價，關於呢點遲D再寫文，今次提出幾件事講下通訊自由有咩代價。

而家通訊極為方便，手提電話人人都有一部，internet既普及令到我地可以觸及全世界，無論視像、圖像、音樂、文字都可以好快咁傳播，我地係一個資訊高速公路上面目不暇給，咁究竟通訊自由有咩代價？

首先睇下2005年6月既一單新聞：

葡萄牙大約500名年青人受到手電與短訊既號召，係里斯本海灘集體搶掠。

跟住最近，係法國，亦有暴徒周圍搶掠、破壞，歷時大約十日，佢地既行動方法係唔同警方直接衝突，打游擊戰，點樣組織打游擊戰呢？同樣係手機與短訊。

上個星期，澳洲爆發種族衝突，澳洲白人同中東裔係Cronulla海灘發生衝突

無錯，又係SMS message同internet。

係呢3單事件之前，其實都有一D跡象顯示出Internet同手提電話既能力，例如快閃黨(Flash Mob)，佢地並唔相識，但靠通訊組織一件無聊事，跟住快速散去，呢種事係以前無手提電話同Internet既情況下根本無可能組織得成。

以上3件事係發生係世界各地，另外，唔好忘記恐怖分子以Internet黎學習炸彈知識，或者組織恐怖活動等等，都係通訊自由既代價。

係可見既將來，我能預見會有一單大單野發生，之後當地政府就會檢討呢個問題，到時可能我地會生活係一個畀政府偷聽，又或者我地網上既自由將會受到限制，呢D都係好容易能夠想象得到。

好事？壞事？

我唔鍾意回答呢種判斷問題，我只會重覆一句：

所有事情都有佢既代價

FANTUS的矛廁