被遺忘的角落(上)

係倪震同周慧敏離離合合既同時，有一篇咁樣既報導：

"聯合國調查盧旺達1994年屠殺的國際刑事法庭判決前陸軍上校巴加索拉以及另外兩名隨從軍官有罪，並判處他們終生監禁。 "

睇到呢段新聞之後，決定拎返隻盧旺達大酒店黎睇，並再做返多少資料搜集：

點解呢宗大屠殺會發生？

點解世界各國就手旁觀？

--------------------------------------------------------------------------

非洲係第二次世界大戰之前都係歐洲各國用黎做殖民地既基地，歐洲各國係瓜分非洲個陣只係諗住國界係邊，至於我劃分呢個國家出黎，入面既種族構成係點，講咩語言等都冇理到。歐洲人個陣亦只鍾意搵一D膚色比較白比較高大既人黎做統治者，例如係盧旺達度，有比較多既人係胡圖族人，但係歐洲人就揀左數量較少但係膚色較白既圖西族人黎做統治者。胡圖族同圖西族係世仇，但呢D矛盾係歐洲強大宗主國係占領下被鎮壓住，而第二次世界大戰後，歐洲各國放棄非洲統治就令到呢D社會矛盾被突顯出黎。

1994年4月，盧旺達既總統Habyarimana乘坐既飛機係基加利上空被導彈擊落遇難，國家入面既胡圖族就乘機發難將矛頭指向圖西族人，開始大約4個月既大屠殺，屠殺對像主要係圖西族及一D溫和既胡圖族人。屠殺人數大概有80萬人(南京大屠殺大概死左30萬人)，而屠殺主要以砍柴刀(Ratchet)進行。 屠殺係極度非人性，孕婦會被殺，佢地既胎兒亦會被拎出黎加以殺害，為左絕對滅絕圖西族，嬰兒及小孩往往會被重擊頭部而死，有D胡圖族會首先斬低一隻手，以後過幾個鐘之後再折發斬埋另外一隻手，之後再返黎斬埋隻腳，冒求希望給與圖西族最大既虐待。

駐盧旺達既聯合國部隊司令官達萊爾(Roméo Dallaire)已經係事發之前向世界各國提出警告，指有跡象顯示胡圖族正策劃緊某D滅絕圖西族既行為，但世界各國對呢件事都採取不聞不問既態度。係盧旺達大酒店電影入面，有一個片段係某國(美國？)發言人以玩語言遊戲既態度(e.g. 冇一個客觀定義要殺幾多人先可以叫種族滅絕，所以並沒種族滅絕行為發生之類)否認盧旺達有大屠殺行為，睇左係絕對感到心寒。

(後話，達萊爾其實係事件發生初期曾經向聯合國要求一支4000人既部隊黎維持秩序，可惜被美國為首既一班國家(包括法國，比利時，英國等)否決，達萊爾以佢有既300人盡左佢既能力將一部分既圖西族人運向圖西族叛軍據點，出左佢能出既一分力。係佢返到加拿大之後，佢被盧旺達既事件影響，出現心理問題及酗酒，係2000年某日發現滯留係一個公園既長椅之下，事件之後被驗出患有創傷後遺症，被逼退休。退休後寫左《Shake hands with the devil: The Failure of Humanity in Rwanda 》，並出任人權組織要職，亦有係國際法庭為盧旺達大屠殺事件作證。)

(上)

雷曼債卷事件

呢單野有幾個好爭論既點，而家講下我既睇法：

1) (針對銀行)銀行係賣個陣有冇誤導成份？
以上指既係某D銀行職員以定期儲蓄既概念黎sell債券，我個人意見係，銀行職員係高層篤數既壓力下有故意隱瞞/略去某D關於呢個product既知識既可能。但銀行職員都可能係因為雷曼個朵先話係低風險，有關低風險既討論下面仲有。

2) (針對銀行)銀行D友話呢隻係低高險，亦都冇提及同雷曼兄弟有關，有冇問題？
我覺得係普通情況下，銀行友話雷曼兄弟會default係低風險係無可厚非，假如係事發之前我存錢入5號仔，問有冇風險架？你會覺得我9up，咁大間銀行邊會倒閉架？！同樣，雷曼係好出名既投資銀行，係出事之前無人會估到呢個金融海嘯咁厲害，會攪到雷曼執笠，攪到美林比人收購，攪到Wall Street investment bank既終結，你而家人地執左你同人話：喂，當初都冇人同我講同雷曼有關架喎？喂，你連雷曼你都唔知係乜水啦，我畀你知道雷曼係乜水，你個陣又點會驚？所以苦主呢個point唔valid

3) (針對苦主) 喂，你地班苦主而家輸打嬴要喎，你唔撚識你投資緊乜你就唔好簽名啦！
我覺得應該分清楚苦主有2類，一類係因為銀行職員以定期黎包裝債卷而落疊既，呢D係值得同情既，另外一類係知道投資緊既係乜，而家蝕水出黎屌鬼既，呢類人只可同佢講"投資梗係要受風險架啦"

有人就話：簽晒名架喎大佬，而家反晦呀？

我都係個句，我假如走入一間銀行開戶口，冇人會畀你一張明細既contract畀你睇架喎，只係叫你填form架ja喎，假如間銀行倒閉左，我無晒D錢話：喂，我開戶個陣冇人同我講喎！畀返D錢我呀！

呢D就係我地既common sense，我點解要擺係5號仔而唔擺係某間阿拉伯蚊型銀行，就係因為我對5號仔有信心。但而家債卷case係唔同於開戶口，我開戶口，我選擇銀行，個choice係我既，我就負起對呢個choice既風險。

但債卷case唔同，畀人呃話係做定期個D，誤以為係同信得話既銀行做定期，但實質係要將風險擺落去一間另外既銀行度，人地介紹個陣用定期黎做推銷，就係誤導，我明明只係信5號仔，原來我筆錢拎唔拎得返係同另外一間我唔識既銀行有關，個概念係唔同既

我同情個班畀人誤導話係定期既苦主。

4) (追問) 喂，白字黑字寫明架喎，心甘情願架喎！

假如有個文盲走黎同律師傾野，畀律師叫佢簽一份野，話係好野黎，文盲簽左，點知原來係呃鳩佢，要佢畀佢副身家出黎，你又會覺得係點呢？

唔係話班苦主無責任，但假如銀行係誤導在先既話，銀行點都要負返佢應得既責任係咪？我個人認為未必係100% refund，但始終應該付返某D責任囉。

5) (對苦主) 你而家講乜都得架啦，又冇證據，你嘈乜野呀？

呢個係應然性同實然性既問題，有冇證據同佢地應唔應該聲討係兩回事。有冇證據係警察或商業罪行調查科既事，講呢句既人應該諗下件事發生係你身上，你會唔會出聲？講呢句野既人應該要明白點樣「同情既了解」。

我老婆畀人殺左，無證據顯示係邊個做，所以我就唔應該追究？咩邏輯呀？

以下再加幾個point:

A) 投資一定有風險

你擺錢入銀行，銀行都可能倒閉，呢點顯而易見

B) 風險低=/=輸既時候損失少

咩叫風險？就係投資expected value 既standard deviation

我買隻馬，隻馬跛左，輸梗，就算我擺100萬落去，我都係低風險！因為expected value係-100萬！唔會點有波動

但普通人對風險既理解係有機會蝕得多就係高風險，係tilted towards蝕個一方面既，亦即係話假如我有兩個投資，一個50% 會嬴$5，50%蝕$10，另一個相反，50%嬴$10，50%蝕$5，其實個風險係一樣架！但你終會覺得第一個風險大D架

(不過當然你會揀第二個，因為expected return高D)

同樣道理，今次其實我都覺得用係出事先用低風險黎形容雷曼係冇問題架，不過今次金融海嘯威力太大所以D人覺得明明係蝕晒點解係低風險？

假如有日香港地震，死左人，D人話"明明香港地震係低風險架？點解會死人架？
個個道理係一樣架，低風險係呢度只代表環顧歷史，香港的確係冇乜地震，唔代表永遠唔會有地震。

長毛與複合問題

香港選舉o岩o岩完左，不過我就成日係youtube搵D長毛或毓民既選舉論壇黎睇，畢竟娛樂性豐富，加上其實長毛既轉數幾快，反駁人又比較直接，又有時吟下詩，選完之後用英文答問題都ok，好過某D著晒西裝既特首辦助理。

睇長毛窒人會發覺佢好鍾意問人"你道唔道歉？"，呢句真係一個好tricky既一個問題，因為係答係又死，答唔係又死：

答道歉-->你道歉即係你做錯野啦(政客又點會認錯呢)
答唔道歉-->即係你做錯野唔認啦

因為問人你道唔道歉係有一個預設，就係你做錯野，不過你認定唔認？

呢一種問題叫做複合問題(Complex Question)，教科書鍾意既例子係"法國皇帝係唔係光頭架？"，問題係法國根本冇皇帝！你問係定唔係都係默認左法國有皇帝。

我比較鍾意既例子係問人"你仲有冇打你老婆呀？"
同樣地，答有同冇都assume左你以前有打你老婆

長毛究竟係有意定無意用呢一種Technique呢？我就唔知，不過嘛，睇佢係論壇既表現，可以解釋點解佢可以受到選民既歡迎，睇佢講野好過聽人打官腔，遊花園呢D不知所謂既回答好好多。

另一方面，其他侯選人面對長毛同埋毓文都註定會輸，簡單黎講就係唔夠人咁爛仔。打交就梗係打大赤膊，一下直拳咁fight過去架啦，問題係其他侯選人唔係律師就係會計師，又打晒Tie著西裝咁，打起交上黎梗係處處受阻啦，我從來唔相信以德服人呢樣野，只相信以暴易暴，我覺得係以家民建聯用技用蛇宴黎屈選票既情況下，實在唔應該用傳統個一套會對付，毓文同埋長毛就係以暴易暴既一個好重要既範例，係論壇上面多次窒住民建聯既侯選人，睇得人大快人心。

藍奕邦 - 時候尚早

藍奕邦係一個新冒起既歌手，佢走既唔係而家最興既靚仔靚女路線，佢亦冇張敬軒把靚聲，不過佢有既係音樂才華。好多歌佢都係自己作曲填詞同唱埋，而歌詞方面睇得出佢係想講某D野，唔係為寫而寫，之前有一首熱帶魚，講社會跟風既現象，令到我開始留意佢，呢一首時候尚早亦係佢作曲填詞，講既係我地而家社會既人營營役役，對前景失去左理想，甚至充滿恐懼，但我地應該講一句「時侯尚早」，前路仍然值得冀盼。

時候尚早
曲/詞: 藍奕邦
編: Adam Lee
監製: 陳德健/李漢金/藍奕邦

何解我未曾問已跟我講你懂
何解你所有口吻 極其像個老頑童
而你不過廿來歲 無法可將一切看通

對所有事情漸忘掉衝動
談起你未來亦滿臉愁容
越去估計前途 偏偏越會幻想起暗湧

但秒針仍在跳 光陰也未窮
凡事也自有它答案 這刻不要碰

@可知道 時候尚早
前面尚有幾多的起伏 佈滿你一生旅途 很多個未知數
行前兩步你便看到 一切總會有分數
時候尚早 讓老天替你一一安排 並未願知得太早
誰預先打小報告 快掩耳 當聽不到
(緩緩地跟青春跳舞 這一剎 人還未老)

人生裡總有幾對手去等你拖
人生裡問題逐條逐條地一一探索
活到七老八十歲 還有很多未曾尋獲

考究深奧的存在意義
何不試一試逐一的去試
亂去偷看結局 多糟蹋揭曉的真意思

若你心仍在跳 不需當先知
就趁有幸去生存時 你即管放肆

Repeat @ with ( )

可知道 時候尚早
前面尚有幾多的起伏 佈滿你一生旅途 很多個未知數
行前兩步你便看到 一切總會有分數
時候尚早 學會將冀盼拋出窗外 便是最好的法寶
誰預先打小報告 答一句 我不知道

謝安琪 - 囍帖街

今日搭機返香港，係機上開始聽謝安琪既新碟，第一首已經好吸引我，因為個種比較失落，比較Sad既歌一向係我鍾意既，再加上有寓意既歌詞，就loop左60幾次喇。

以前我唔鍾意黃偉文，但而家我覺得佢的的確確係過左林夕，寫詞經常用比喻既手法黎講故事，令到人好有代入感，再加上Kay 既聲，形成一個非常成功既作品。

我一開始聽聽得到係講離婚(或婚姻失敗)既，不過我對囍帖街同佢既關係唔係太理解，要係屋企坐定定上網搵下料先明，但明左之後就只可以更鍾意呢首詞，上一次有呢個感覺既係落花流水。

最鍾意既係最後一句，好隱秘咁透露左一種依依不捨既心情。

忘掉種過的花 重新的出發 放棄理想吧
別再看塵封的囍帖 你正在要搬家
築得起 人應該接受 都有日倒下
其實沒有一種安穩快樂 永遠也不差

就似這一區 曾經稱得上 美滿甲天下
但霎眼 全街的單位 快要住滿烏鴉
好景不會每日常在 天梯不可只往上爬
愛的人 沒有一生一世嗎 大概不需要害怕

忘掉愛過的他
當初的囍帖金箔印着那位他
裱起婚紗照那道牆及一切美麗舊年華 明日同步拆下
忘掉有過的家
小餐枱、沙發、雪櫃及兩份紅茶
溫馨的光境不過借出 到期拿回嗎
等不到下一代 是嗎？

忘掉砌過的沙 回憶的堡壘 刹那已倒下
面對這 墳起的荒土 你註定學會瀟灑
階磚不會拒絕磨蝕 窗花不可幽禁落霞
有感情 就會一生一世嗎 又再惋惜有用嗎

忘掉愛過的他
當初的囍帖金箔印着那位他
裱起婚紗照那道牆及一切美麗舊年華 明日同步拆下
忘掉有過的家
小餐枱、沙發、雪櫃及兩份紅茶
溫馨的光境不過借出 到期拿回嗎
終須會時辰到 別怕

請放下手裡那鎖匙 好嗎

2008年上海電影節 - 如月疑雲

黎到上海之後第一次上電影節，本來想睇東邪西毒終極版，點知已經sold out喇！

千揀萬揀(去imdb逐個睇評分)揀左呢套為第一套睇，故事大概係話少女名星如月自殺逝世一年，5個fans聚埋一齊去懷念佢，係經過一輪抽絲剝繭下，終於搵到如月死既真相！

本來以為係一套偵探片黎既，點知一睇片頭就知係一套搞笑既片，心情涼左一截，再加上安排失當，個字幕機出唔切D字幕，係播左10分鐘後被人大叫「重播！」，所以多多少少影響左睇既心情。我到而家都唔明，將字幕嵌入去電影度唔係D咩新科技丫，點解要專登整個字幕顯示牌，駁埋電腦做呢？

講返套片，我個人認為應該係做舞台劇好D！因為2個原因，演員用左一個比較誇張既演技黎做，係可以用浮誇黎形容，第二，就係場景基本上無變過既！除左回憶個陣用左D好似剪貼式既方法黎表達，係幾得意同埋加分既野。

至如個plot方面，其實係ok既，最後都合理咁推到個結論，都叫有少少驚喜架啦，最後就整多場如月生前表演既一首歌，但係演如月既呢位少女呢.......就肥膩左D喇................:)

假如唔係D浮誇演技同埋日本仔例牌既低能感人對白之外呢，應該都可以有75分既，但扣左分......60啦！

And 1

呢個世界有人係完美主義者，有人做野又馬馬虎虎得過且過。

完美固然要付出代價，馬馬虎虎又會影響你既仕途。

我對於「呢件事我究竟要出幾多力？」呢個問題有以下既見解

假如而家有一個準則，100分係滿分，普通人多數做到60分，我就會做60+1=61分。

首先一樣野，你做100分既代價係好高既，大家都知咩叫reducing marginal return：假如你聽日要考試，而你係未溫過既話，由而家開始溫，可能你溫5個鐘就可以合格，平均1個鐘marginal return 10分。

要考100分，你要溫既範圍就要廣泛得多喇，可能要50個鐘你先可以考100分，平均1個鐘marginal return 2分

對於呢D過左關就得既情況，我只會要求合格再加上一個safety margin (+15分)咁就冇問題，所以我係Uni係拎credit average既。(咁當然出到黎社會搵工，credit average就見少好多工喇，不過我相信工作經驗係重要過學校分數)

對住一D要同其他人比較既情況，我就會保持我既+1政策，唔洗做好你好多，好你少少就得喇。

要知道考核一個人，考核人個個一定要比畀人考個個叻你先可以知佢實際有幾叻，所以從來都係大學生考中學生，中學生考小學生，小學生考幼稚園生，倒轉係唔work既。

假如考核你個個係只有60分功力既話，你考100分佢都唔會明白個extra 40分既野，佢係知你好過佢，但佢係唔會知好佢幾多

所以假如你考61分既話，你就可以畀人一個印像就係你好過佢，至於好佢幾多？佢都話唔盡，佢知僧介乎於60-100分之間，咁好有可能佢會揀個中間數80分。

你付出61分既力而得到一個80分既印象咁咪賺左19分既力囉？
如上，你付出100分既力考100分，人地都只會以為你考80分(因為人地只有60分既功力去評核人)，你咪變相蝕左20分既付出囉？

所以，+1政策既好處就係以最少既努力獲得最大既結果。

就算唔從個人角度講，從群體角度，+1政策都有佢既好處
而假如你開始做到60分，見到人地好過你，你當然會想做得比佢好，咁你就會做做做，做到62分。做到62分後你就會發覺原來人地只有61分料，你就會係62分停落黎，而原本61分既個位人兄亦會去63分，跟住又到你去到64分，如此類推，直到其中一位到達佢既頂峰為止。

假如你一開始就考100分，其他人點進步都係發覺100分既呢位遙不可及既話，你仲會有動力去進步嘛？可能你連踏出第一步都唔會。

所以嘛，我一定唔係一個完美主義者，我自己會評價自己做一個功利主義者。

註：And 1係一個籃球術語，指球員係得分後再有一個罰球機會。