Meet Old Friend

聽日會同一班Tower舊同事食晏晝。
Tower係我係澳洲第一份正式既工，雖然係Contract 形式，但係學到好多野，尤其是學寫VBA (從Mark Johnson)，同埋第一次做一個Team Leader。

但係更重要既係識到一班好既同事，Chris Wood，Jay，Shaini同Baneesha。我地5個人成日係晏晝圍埋一齊食晏，跟住傾計，我可以同佢地講我鍾意既舊戲，我鍾意既書，我鍾意既科學、宗教、數學、哲學，呢D野都係一般香港人做唔到既。

得罪D講句，香港人眼光狹窄，只係識講人是非、返工做野、讀書專業試，識人方面又只係小圈子，唔鍾意同唔講中文既人交往。我係Year 1 之前都仍然係我自己，研究宗教哲學，可以為左一篇講科學與宗教既文章花一兩個鐘去圖書館做research，photocopy o岩既文。不過我始終需要朋友，我係Year 2 開始明白呢點，開始遷就佢地，戴上一個「口臭」既面具同佢地交往，希望佢地係畢業後會有所改變。

而家畢左業2年喇，我無法改變佢地，亦知道改變唔到，佢地仍然係咁樣，一個二個好似係工廠倒模出黎，無自己既諗法，每一次聚會都係廢話連篇，佢地仍然覺得互相寸黎寸去係好有趣，我就悶得發慌。

係Tower個陣就唔同，Chris Wood會同我研究究竟費馬個陣係唔係真係搵倒Fermat's Last Theorem 既Proof？佢亦會係放左工之後同我傾我呢2年既哲學諗法，我對權力、遊戲規則既睇法(詳細可以睇我上年既文，未完成，但大綱仍然係度)，又或者SudoKu既解法。Shaini會同我講下宗教同神，Jay會同我研究基督教，道德論又或者係Tim Burton既戲。Baneesha雖然冇咁philosophical，但係我都同佢傾左結婚係為咩。呢D野，係香港人面前，基本上一講就會即刻被嗤之以鼻，佢地會表明呢D野悶，唔想講，佢地只係想嘻嘻哈哈又一日，畢竟宗教哲學搵唔到錢，我係呢度打咁大段野，佢地就算知道呢個blog都唔會睇，咁長，你想佢地死咩？

香港人反智，我唔係第一日知，但係要係心態上適應，仲有一段距離，尤其當我係香港有一班成熟，有見地既朋友既話，就更加令我難接受。

不過好彩我係雙子座，可以一方面自閉式學習、一方面同佢地嘻嘻哈哈，聽日我自閉既一面又可以出黎抖抖喇。