RePost - Buena Vista Social Club

最近開始用v2direct呢個郵寄租DVD服務，最好既地方就係唔洗我走去DVD舖晒時間搵我鍾意既舊戲出黎，又唔洗等人地還先有得睇，不過當然係貴D啦......不過興趣對我黎講都係大過天架喇，無所謂啦。
最近睇既係Buena Vista Social Club，《樂滿夏灣拿》，呢套片係講關於古巴音樂既。話說美國音樂人Ry Cooder去過古巴一次之後就鍾意左古巴音樂，之後係美國有人想佢幫手搵古巴音樂人黎做隻CD，Ry Cooder就想搵住係歐洲既某位著名樂手啦，點知呢位著名樂手已經唔係度喇，所以Ry Cooder就走去古巴，搵到一班上晒年紀既古巴音樂人，希望可以係佢地有生之前向全世界推廣古巴音樂。呢班音樂人包括歌手Ibrahim Ferrer，鋼琴手Ruben Gonzalez，寫曲人Compay Segundo，歌手Eliades Ochoa等等。
佢地係1996年灌錄左 Buena Vista Social Club(呢個係古巴一間畀上左年紀既人去既Club)，結果得左廣大樂迷既支持，呢班古巴樂手到世界各地演出，用佢地人生最後既一段時間黎推廣古巴音樂(例如Ruben Gonzalez係錄唱片當年已經係78歲既高齡，主音歌手Ibrahim Ferrer都70歲喇)，呢套戲就係講每位樂手既過去同佢地世界各地演出片段既收錄。
係影片入面可以見到每位樂手都係寶刀未老，而且你亦可以見到佢地係真真正正享受音樂，對古巴音樂既熱情係非常強烈既，比較可惜既以上所講既幾位樂手都係呢3年入面過左身喇(Ruben Gonzalaz, Compay Segundo 係2003年過身，Ibrahim Ferrer係2005年8月過身)。而Buena Vista Social Club亦已經拆毀，未知古巴音樂會唔會o岩你既口味呢？