森美專訪 - 節錄

今日係壹週刊睇森美訪問，節錄2段畀大家睇：

第一段係陶傑妙論茄喱啡

----------------------------------------------------------------------------------
臨 走 時 ， 森 美 說 了 個 無 聊 笑 話 與 我 分 享 ： 某 年 某 月 某 日 ， 他 和 幾 位 同 事 在 商 業 電 台 某 樓 某 走 廊 吹 水 ， 話 題 忽 然 轉 到 茄 喱 啡 （ 臨 時 演 員 ） 這 個 名 詞 出 自 何 經 何 典 ： 吹 水 同 事 當 中 的 陶 傑 認 為 ， 茄 喱 啡 是 從 英 文 Carefree 這 個 字 直 譯 過 來 ！ 「 ！ 個 名 咁 似 生 巾 ？ 」 某 同 事 半 信 半 疑 。
「 梗 係 ， 茄 喱 啡 同 生 巾 一 樣 ， 都 係 攝 攝 ！ 」 陶 傑 以 一 貫 皮 笑 肉 不 笑 加 強 語 氣 。 大 家 笑 不 停 時 ， 陶 傑 才 作 總 結 ， 「 其 實 ， 都 有 唔 同 ， 生 巾 總 有 日 會 紅 ， 茄 喱 啡 一 世 唔 紅 ！ 」
----------------------------------------------------------------------------------


第二段係森美談年青人
森美講既唔識表達自己就係我我成日話D人無獨立思考，同一個道理。

----------------------------------------------------------------------------------
壹 ： 對 兒 子 有 什 麼 期 望 ？
森 ： 現 在 所 有 年 青 人 ， 都 唔 懂 得 亦 唔 鍾 意 表 達 自 己 ， 食 一 碟 飯 ， 連 好 食 唔 好 食 都 唔 肯 講 。 我 希 望 我 下 一 代 識 講 ； 飯 質 點 呀 ， 有 無 香 味 ， 口 感 如 何 ， 是 日 本 米 定 泰 國 米 抑 或 中 國 米 。
----------------------------------------------------------------------------------

Education and Job Training

好多人都攪唔清教育同埋就職訓練。
佢地以為受教育就係搵好工，就係賺得多錢。

呢種諗法係亞洲人當中非常普遍，至少我阿媽咁諗，我Auntie咁諗，我D同學咁諗，唯獨是我老竇唔係咁諗。

家父未退休前係大學度做，所以對於教育有佢既一套見解，佢認為入大學唔係話只係學你讀個科既知識，而係要學「點樣去學野」，世界咁大，仲有以家D科技日新月異，你只係識你個科既野邊夠用？所以大學應該係教你點樣係以後既日子入面自己學野，自己思考，自己尋覓。

我Expand一下佢講既野，就係要學擴闊視野，學擁有一套自己既睇法，學點樣獨立思考。老竇真係身體力行，唔係得個講字，佢真係咩書都睇(除左小說)，連我D 大學參考書都唔放過，我鍾意睇書都係承襲左呢個優良傳統。另外，我畢業之後一直堅持學野，無論係睇書，又或者係上堂，我唔容許自己停滯不前，亦都係佢帶畀我既啟發。

不過，擁有呢個諗法既人唔多，多數人都係覺得教育就即係Job Training，係訓練你點係社會度搵份工既，你有一份工就諗點樣升職加人工，方法？讀Master，考專業試，去考證書，佢地只會係一個既定範圍入面學野，永遠唔會走出呢個框框，因為佢地睇唔到呢個世界有幾大。
教育係應該好似古希臘時代咁，以思考為先，佢地個陣唔會話考咩考物，睇下蘇格拉底點樣同其他人傾計，你就會知道佢個種以思考為先，不斷學習新事物既態度，以前邊會有而家會計科、精算科、經濟科丫？以前D科全部係今時今日黎講係唔等使野，香港話黎講係on 9 野，佢講出黎人地當你怪物一樣，又或者一句「呢D咁深既野我地唔識架喎」，反智之極。

上年年尾，係報紙睇到話澳洲政府順應僱主要求，諗住係High School Certificate加入一個叫做Employability既分，講你呢個考生適唔適合出黎做野。
可能資本主義真係大行其道啦，就連社會呀、政府呀都擁有呢種諗法，我睇我呢D史前巨獸係應該早D收皮喇。

Milsons Point夜攝 (二)

原來夜晚既Opera House係好靚既......

Milsons Point 夜攝 (一)

係每日搭船既ferry上面，經常見到類似以上取景既相。尋晚我就決定去模仿一下......

鞋

今晚出左去影相，地點係以前Tower既所在地Milsons Point。可以話我想買部好相機去影相就係因為係Tower養成左返工放工搭船既習慣，係碼頭睇過去Circulay Quay個邊真係好靚，睇得多自自然然就想影。

2個星期前見Victoria Road間鞋舖大減價，買左對新鞋，不過2個星期以黎冇諗點用佢黎行過路，所以今晚會係一個測試。

一向唔鍾意買鞋，因為新鞋著落刮腳，我又鍾意行路，刮腳好辛苦。記得以前家姐係美國買過對Vans畀我，我好鍾意，因為好輕，著左真係好似識飛咁。著左5-6年，畀我行到蝕晒，係爛到鞋入面個底都蝕到去到鞋既硬膠部份，著落會痛個隻。

我逼不得已要去買對新既，不過揀黎揀去都揀唔到，多數都係個款唔o岩心水，我要D平平實實既，唔好咁誇張既。另一個要求就係要襟，我行好多路，我希望對鞋都可以同我一齊周圍去，著得我舒服。顏色都好重要，我D褲多數都係黃黃啡啡既，所以我都多數揀黃黃啡啡既鞋，鮮紅呀、鮮藍一定唔o岩。當然價錢都係一個重要因素，我個陣仲未有搵錢既門路，點買得起貴既鞋丫？

個次每個星期六就會出去希望買個對新鞋，因為著住對舊Vans真係行幾步路就痛，我個幾個星期就係咁痛住黎搵，可惜多數都唔o岩心水，後尾真係要妥協，因為隻腳真係頂唔順，當你行每一步路都痛既話你就會降低自己既要求，最後終於買到對，不過今時今日諗返起，已經唔記得個牌子喇。之後轉過2次鞋，呢2次唔係話好似上次咁真係著到爛，迫不得已要轉，而係對新既鞋始終都會同對Vans比，而對Vans始終都係我心目中係最好最舒服既鞋，每一次都覺得對新鞋滿足唔到自己。

咁點解唔搵返Vans呢？唔係唔想搵，而係搵唔到，我自己唔係成日出街，梗加少買衫褲，所以到而家都未搵到有Vans買，以前冇工個陣唔會諗住買對Vans黎著，都係家姐送畀我先知有D咁好既鞋著，而家有穩定既收入喇，想搵返對舒服既Vans著下都唔得，有時個天就係要咁整蠱你。

唔知道仲有冇著返Vans既機會，不過我仍然會一直搵，希望搵到o岩我著既鞋。

轉載 - 她們要求太高了

Well，見阿嫻姐今次寫野有返D Sense，就畀佢係我既矛廁度坐一坐啦......

時代D05
Mingpao
張小嫻 2006-03-24
貼身感覺
她們要求太高了

我身邊的女性朋友大部分都是單身的，有些甚至已經許多年沒談過戀愛了。女孩子找不到男朋友，我們可以說出一大堆原因，好像外表啦、性格啦、工作環境啦。不過，最大的原因往往只有一個：她們要求太高了！不漂亮的女孩子還是可以有許多男朋友的。我有一個舊同學，長得很平凡，是平均水準以下的質素，但是，她從十七歲踏出社會工作開始，裙下之臣無數，幾乎是一個接一個的。我們同屆的同學之中，長得比她漂亮，甚至稱得上是美人的，沒有一個的桃花運比得上她。由此可見，外表並不是決定的因素。性格可愛的女孩子，即使不漂亮，也會找到男朋友。性格缺點多多的，同樣會有喜歡這種性格的人。除非她性格太孤僻，不肯跟人來往，否則，性格也不是障礙。工作環境不錯是重要，在一個陰盛陽衰的地方，找個伴侶並不容易。前陣子不是有新聞說，許多老師都嫁不出去嗎？但是，那段新聞?也說，女老師沒愛上同校的男老師，通常是因為嫌棄他們沉悶。女人是很擅長嫌棄這個、嫌棄那個的。她們要不是喜歡身邊的男人，便是暗中嫌棄他們。女人對伴侶常常會有許多不切實際的要求，然而，我們身邊的男人卻沒有一個是從浪漫愛情電影或言情小說中走出來的。要求太高並沒有錯。你可以永遠都不降低你的要求，過自己一個人的日子，只要你不害怕寂寞就好了。桃花運和過高的要求，通常是沒法並存的。

從Sudoku睇價值觀

尋晚去左Strathfield食斯里蘭卡野，攪手係以前Tower既同事，D野幾好食，我尤其鍾意個個Meat Roll，有口感。

我一直都有同舊同事有聯繫，因為呢班人傾得埋，至少我同佢地有對等既對話，即係我有Idea，佢地亦有Idea，咁樣人先有進步。我同呢班人講既Topic明顯比起其他香港人多，畢竟香港人只會講幾樣野：

1) 廢話 ，以為2條友互相寸黎寸去係好好玩既事
2) 工作讀書
3) 錢、購物
4) TVB劇集

或者我識個班人讀既係叫做精算，對錢真係睇得重，好重，搵錢既會理，唔搵錢既就唔理。

我就專做埋D唔搵錢既On 9 野，下面講個例子說明呢2班人既著眼點係咩：

話說某星期五，我個陣仲係Tower做緊野，晏晝個陣Shaini同埋Chris係度玩緊D填字遊戲，我問下係咩黎啦，原來呢隻野係Sudoku，數獨是也，我係Shaini所指既日本網站度Print左一個之後就開始玩喇，畢竟Lunch time時間有限，食左半個鐘野，又玩左半個鐘，只係做左Sudoku既一半o者，我就要繼續做野，但係我已經有頭緒點樣有系統化咁做Sudoku。當時係Tower，工作緣故，學左VBA，個陣都係初手，仲係摸索階段，就決定用新學既VBA寫個Program黎解呢個Sudoku。

我一返到屋企就開始左呢個project，星期日已經完工，星期一帶返公司畀同事睇，當然佢地會覺得我痴線，不過chris會問我個原理係咩，仲指出左一個可改進之處，我就將佢再改進，本來想繼續改進，直到可以解開每一日登係報紙上面既Sudoku，不過試左2個星期，報紙上面個D太過淺，基本上難唔到我個program，唯一難到我既program既就係要估數字開始既Sudoku，我個人唔鍾意用Brute Force解決數學問題(係架，我覺得4色問題係未解決架)，所以我就咁丟低左我個program。

故然，佢地會話我痴線，但係始終Chris係抱住一個求真既精神去同我研究呢樣野，仲有佢有時會專登留係公司同我傾我既哲學，呢D都係我係精算班香港人身上搵唔到既事。

我都有send我呢個program畀我2位精算男同學睇，佢地冇反應......直到5個月後有一個星期，佢地2個都不約而同咁問我係點樣學VBA，但就從來冇同我講過解Sudoku既技巧問題。咁究竟個個星期發生左咩事呢？點解會係5個月之後同一時間問我VBA呢？

原來，我個個星期話左畀佢地知Deloitte請左我，咁佢地就係個個星期問我點樣學VBA喇。

請留意，係2個人同一個星期，係事隔我整Program 5個月之後既同一個星期問我，你覺得係巧合定係所為某事呢？咪又係錢作怪，想入大公司賺多D錢，拿，你唔好話我亂屈你，你地讀精算既，你咪計下個機會率係幾多囉，同一個星期我話搵到工，你2個係度問我點樣學VBA？又同一時間2個人一直5個月黎都冇對個Program有任何興趣，失驚冇神想知點學？

呢班香港既精算人就係咁膚淺同短視，我一入大學個陣已經覺得，個陣都話仲細，而家出黎做野喇，一樣個眼界冇擴闊過，我已經好厭倦同呢班人講野，6年黎我係佢地身上一D野都學唔到，更奇怪既係，我未移民之前，竟然同我香港個陣既中學同學，有比呢班大學同學有更高質素既對話，實在係悲哀。

舒特拉的名單

自從高中畢業返香港做暑期工個陣開始，就有星期二入戲院睇戲既習慣(因為平D)，不過多數都係自己一個去睇，好少話同人睇，除左有一排同Andy同埋Lucia 3個人一齊睇戲，都維持左幾個月，不過而家佢地忙，我又開始自己睇。

唔係話唔想同人睇，不過咁大個人總有喜好既，首先係戲院一路睇戲一路講野個D就要Out，呢D係基本禮儀，試過一次睇真係好尷尬，真係想扮唔識。
跟住係一D鍾意D/L戲既人，呢D人就唔係我Out佢，而係佢Out我，咁冇辦法既，我專做On 9 野，呢D唔洗錢都睇到既戲做咩要畀錢睇？香港人就係咁架喇，咁我都唔介意既，我睇戲唔同你睇戲，我睇戲鍾意專心一致，有大銀幕睇，睇完仲要睇埋影評，仲會打影評添，我肯花錢同時間係睇戲方面你唔肯；我肯花錢同時間係個女仔身上你話叫雞咪得囉，價值觀都唔一樣，傾唔埋。

仲有一種又係好Q乞人僧，約睇戲，佢係對套戲有興趣，時間都冇問題，但問你仲有邊個去，冇人去佢就唔去，一個月黎已經有2個例子：
一個就話：我呢就有野做，不過假如有多D人去呢就得
連續2個星期都係咁講，哇，你當我白痴架，有野做就有野做，冇野做就冇野做，多D人去你就唔洗做？講藉口都搵個好D架丫
另外一個呢，本來諗住星期日睇戲既，就話：我未決定喎，星期日可能我去攪下個頭髮
跟住我問，星期六啦咁，佢又話：唔知星期六定星期日整頭髮
屌，冇心去就唔好搵低能藉口呃Q我啦，我講過幾多百次，我係觀察人既行為黎做判斷，你解釋一千幾百萬句係冇用既，我地都唔細啦，仲要一大班人去睇戲？下？咩睇戲多D人去會好睇D既咩？真係唔覺，我睇戲就真係為睇戲，唔係為聯誼，唔該攪清楚。
以上2個例子都係女仔，或者我女人緣太差啦，不過呢我就咁諗，你推我睇戲就不外乎3個原因：

1) 時間唔o岩
2) 套戲唔o岩
3) 人唔o岩

1)同2)你今次唔鍾意，下次都可能會夾到，人就唔同喇，次次都係我攪架喇，一定有我份架喇，你唔鍾意既話我叫多你一千幾百萬次你都唔o岩架喇，咁不如唔好叫你啦，慳返。

所以嘛，以上2個女仔都會係我既List上面剔除，下年再算啦。

題解：
舒特拉的名單，史匹堡既鉅作，講舒特拉點樣係德軍手上救出猶太人，將更多既猶太人加入佢既名單之中
我既名單就倒轉，將D人係名單上鏟除

書評 - 異鄉人

卡繆(Albert Camus)第一次寫既小說，到而家都係被認為係荒謬主義既代表作(縱然有人認為呢本係講存在主義既書)。小說黎講，非常短，大概120頁，我自己今年開始睇返D小說，用呢D短既小說黎做熱身，實在係最好不過。

故事一開始，讀者就會覺得內容一拼一湊，好似冇主線咁，描述Meursault(故事以第一身描述)母親過身，佢請假去參加母親既喪禮，故事好細緻咁描述每一件事，每一個過程，母親喪禮後第二日，佢去海灘，遇到一個女仔，就將佢帶返屋企。故事以第一身描述，但係字裹行間卻從來冇講過主角對母親逝世有咩傷感。佢對呢位新女朋友亦都冇所謂既愛，佢只係好鍾意呢位女仔既笑，同佢既裙；老闆有一份新工作畀佢去巴黎工作，佢亦都唔多在乎。呢個就係故事既第一部份。

第二部份，描述主角因為幫一位朋友而得罪左一班阿拉伯人，佢地係一次海灘聚會個陣，主角同友人同佢地起左衝突，打完交之後，主角拎住友人既槍，湊巧咁遇到其中一個阿拉泊人，「因為陽光太耀眼既關係」，佢誤以為阿拉伯人舉刀攻擊，就將佢槍傷，跟住係阿拉伯人倒地之後再打多4槍殺左呢個阿拉伯人。之後，審訊開始，因為之前主角係母親喪禮上表現冷漠，所以主角被認為係冷血無情，佢被判處死刑。係第二部份，主角被審判到被判死刑，佢都冇好大既感覺，佢冇為自己辯護，畢竟殺人既原因唔係因為仇恨，而之不過係單純咁因為陽光耀眼，卡繆所塑造出黎既就係咁既一個Outsider(法文L’?tranger可以指外地人，亦可指Outsider)，同普通大眾有著唔一樣既感覺─冇感覺，將佢定罪既唔係佢點樣殺呢個阿拉伯人，而係佢對呢個世界同佢母親既冇情，最後，牧師黎勸佢歸向神，佢終於第一次係小說入面發火，鬧走左牧師，跟住佢明白到宇宙同佢一樣都係冇情，佢同宇宙就好似兄弟咁，小說既最後一句就係講主角唔介意接受死刑，反而希望多D人黎睇佢既死刑。

※※※

故事看似唔真實，但諗真D，呢種人確實存在，對親人冇感情、對愛情冇感覺、對工作唔熱情、唔相信神，我認為普通人會好難投入到呢個角色，畢竟卡繆本身就係一個Outsider，佢係法國人，但住係北非既法國殖民地(Black Foot)，佢唔贊同婚姻(縱然佢結過婚，但佢婚後仍然話佢係唔適合結婚)，佢患過肺結核等等經歷，都令佢對於L’?tranger呢個字有更深入既理解。自己同主角有D似既地方在於我對親人亦都係冇乜感情，對工作唔熱情，我亦唔信神，亦好似卡繆咁唔相信婚姻，好多朋友都唔理解，嘗試說服我但失敗，唯一唔同既係我對某D興趣會肯花時間同金錢去投入，呢樣野我自問係一個熱情既、投入既表現，但係係香港人文化入面，佢地只關注工作，讀書，搵錢，係呢個圈子入面，我仍然係一個L’?tranger，所以我對呢本書係可以好投入，好認同。下次入貨應該會睇佢既《瘟疫》。