有Heart

「我覺得呢份功課做得幾有Heart。」
「喂，呢套戲拍得幾有Heart架。」
「呢首歌......唱得幾有Heart丫。」
......
......

即係點？

◎◎◎◎◎◎◎◎◎◎◎◎◎◎◎◎◎◎◎◎◎

假如你做功課真係好既話，就應該講：
「我覺得呢份功課Research好足，寫得亦好流暢，係編排方面又容易明白，唔錯。」

假如你拍戲真係好既話，就應該講：
「呢套PTU非常好！好明顯杜琪峰再一次表現佢拍男人情義個種經驗，而且巧妙咁利用燈光來營造出一種好好既氣氛，任達華個種亦正亦邪既面亦都好o岩呢個角色......」

假如你唱歌真係好既話，就應該講：
「首歌唱得唔錯喎，係Chorus既地方感情豐富，雖然頭段歌詞又快又密，你都可以唱得好清楚，你又抑壓左你成日有既抖氣聲，有進步喎。」

◎◎◎◎◎◎◎◎◎◎◎◎◎◎◎◎◎◎◎◎◎
讚人要咁樣讚先至係正路，咁樣先至係言而有物，物有所指，你可以講得出你點解覺得好，可以Quantify你既「好」，咁先至有意義。

但假如你咩都冇得讚呢？但又唔想傷人地心(e.g. 可能人地係你既老婆\女朋友\追求目標，又或者佢係你下屬\學生\米飯班主)，咁唯一可以講既就係「你做D野幾有Heart丫。」。

讚人「幾有Heart」已經成為讚人既最低要求，又或者講係最低消費，你睇份功課\睇場戲\聽人唱歌，你至少要擺低一句「幾有Heart」你先好走，就好似係去飲茶既茶錢一樣，點心你可以唔食，但茶錢唔可以唔畀。

試諗下，你去飲茶，人地問你
「喂！覺得呢間茶樓點呀？好食唔好食呀？」，

你答
「Hmm......D茶幾好飲丫」

咁你知D點心咩事啦？畫公仔唔洗畫到出腸呀下？