書評 - 打噴嚏，Tuesdays with Morrie，ICAC

係internet識到個識睇紫微斗數既人，佢話我今年有天月星影響，即係會「跟風」，隨波而流。

係睇書方面確實係應驗既，由大學開始唔鍾意睇小說，覺得冇必要晒時間睇D人地作既故事丫，所以會睇科普書呀、數學、邏輯、哲學、經濟學書黎睇，不過近黎唔知係唔係工作繁忙，覺得睇呢D書太heavy，唔係朝早搭船應該睇既書，又或者話，睇「正經書」既速度好慢好慢，每睇完一個chapter仔又想放低本書去訓覺。

所以今次返香港買既書，全部都係小說類，或者講下我買左咩書先：

打噴嚏

Tuesdays with Morrie

一公升的眼淚

狼圖騰

香水

我的名字叫做紅

全部都係原本係中文或者係中文譯本，呢個亦係改變左我以前既一般做法，因為我之前個3-4年都係睇英文書(因為冇中文書買到)。

第一本睇既係九把刀既打噴嚏，九把刀係最近一個新興作家，以題材多以出名，書版有人力讚佢既書，呢本應該係屬於愛情小品類，講主角愛上既女孩子，有一個超能力英雄做佢既男朋友，身為正常人既主角又應該點應付呢？

我以前係好怕睇愛情小說，唔鍾意D人為左愛情要生要死，不過既然決定改變自己既睇書習慣，就順手拈來，聽下人地點講再買啦。呢本「打噴嚏」其實我覺得係得既，寫得幾細緻下，而個故事安排亦有D意思，可以主角最後既行為係被作者編好伏線既，我基本上4日就睇晒喇，自己都有D詫異我既睇書速度，因為以前睇書，因為語言既問題，拖到好慢好慢，而家睇書得心應手，個感覺返返黎，非常good feel。

跟住睇Tuesdays with Morrie，係勵志故事，講患上肌肉痿縮症既Morrie教授同佢既學生Mitch係Morrie教授人生最後3個月入面既對答。

呢本書都好出名，不過我一向都迴避Self help又或者係勵志故事，因為我覺得我唔需要呢D書，我需要既係知識，係數學科學量子力學哲學歷史等等，不過都係個句，因為自己最近睇書力不從心，再加上最近身邊發生左D不愉快事，所以要睇下其他野平衡返。

就算係咁，我對勵志書有一個介心，就係我唔鍾意睇D成功人物點樣發奮圖強，因為我始終覺得吹水成份好高，我要睇就衰D講句，一定係要有人死先安樂。唔係我黑心，而係當人真係面對死亡，面對終結既時候先會學懂謙卑，寫既野先會有一種說服力。所以我亦有買一公升的眼液，本來想買埋潛水鐘與蝴蝶，但搵唔到，但咁樣就有我既第二次購書行動，見下。

Tuesdays with Morrie其實我覺得重要既唔係教授講既說話，而係Mitch點樣改變自己既睇法，

尤其關於佢同佢弟弟既關係，同佢女朋友既關係，你都見到有一種微妙既轉變係入面。美國電視台就將Tuesdays with Morrie拍做一個小既program，我睇完本書後係youtube搵到呢個節目，個晚就睇晒佢喇，係電視入面，Mitch既呢個人生改變過程集中講佢同佢女朋友既關係，同佢細佬個段就省去左，但女朋友既一段就加左多少戲劇元素係入面，叫做「補返數」啦。

睇self help書有度好既就係睇完你會有一種心靈提升既感覺，會重新睇到返人應該有既人性，對於我黎講係真係有安慰同鼓勵既作用，唔係每個人都自私，不過你未搵到人班好既人o者。

就係因為鍾意Tuesdays，所以有日就出左去KinoKuniya去睇下有冇潛水鐘與蝴蝶，點知搵唔到，不過就忍唔到手買多左以下呢幾本

ICAC

風之影

RAW相片編修入門版

要講既就係ICAC，顧名思義就係講老廉既事。呢本書我係有心機去睇既，不過就可能作者係台灣人關係，又或者嫩得滯，所以寫野就有有D累贅既感覺，同埋對解釋complex既business deal或structure都有種冇力感，即係解釋得唔詳細唔詳盡，同埋對近期發生既案，可能因為未定案唔講得咁多，又或者係資料收集唔係咁詳盡，睇落都係冇乜味既。

我唯一覺得意外既係佢對於聯交所貪污案港督既責任有一個幾特別既見解，加返唔少分。

總括黎講，睇書興趣重拾，係一個大好事，3個星期就睇左3本書，快以前幾十倍，而對於3本書既評分嘛：

打噴嚏 - 7

Tuesdays with Morrie - 7.5

ICAC - 4

遲D有機會可以寫深入D。

影評 - 跟蹤

我揀Sydney Film Festival第4套戲就係呢套跟蹤，我不嬲都鍾意銀河映像既作品(銀河映像，超乎想像！)，畢竟警匪故事係香港片強項，更加係杜琪峰既強項(杜琪峰係監制)，雖然唔係杜琪峰導演，但係都畀次機會畀佢既編劇拍檔游乃海啦！

故事講既係刑事情報科跟蹤隊，俗稱狗仔隊既故事，任達華做一個老練、好照顧下屬既頭領，徐子珊就做新丁。講真，我真係唔覺得徐子珊係港姐出身，因為佢實在......太豬女喇！(豬女係佢戲入面既code name) 唔知係揀人好定係化妝好喇，總之徐子珊係好有個種任達華係戲入面講既「唔醒目」既樣，好有新丁既說服力。梁家輝再一次同任達華做對手，一樣有個種狠味係度，不過比起黑社會個陣收左好多，只係係起殺機個陣你先會feel到。咁當然，例牌銀河映像招牌演員、林雪、邵美琪、張紹輝都有份，比較叫做起眼既係邵美琪，做爛口既女上司，不過或者因為唔想套戲變3級(你知啦！香港D道德判官幾咁多架啦)，所以講D粗口仲少過我！最多係妖下，頂下人個肺，加個Q字咁啦！唯一要彈下既係英文字幕，係畀唔到個D粗口出黎既，咁當然唔係我想去睇英文字幕，不過同行既外國Tower同事就實在唔會睇得出個種爛口法。林雪就照舊係為左加笑料入去戲入面，佢都做到熟晒lu，張紹輝就印象唔深。

套戲賣既當然係跟蹤隊既個種張力，係有一種似曾相識既感覺，假如有睇鎗火既就明，個種分工清楚，個種調度，係唔需要大場面、唔需要爆炸或者槍戰都營造到出黎。鎗火都係一樣，最好睇既個場戲係係商場入面掩護大佬走人一幕，冇鎗戰，但係5個人既團隊每個人有自己既角色，係好細緻咁將整個團隊既能力推出黎。聞說杜Sir籌備緊套新戲文雀，聽落亦都係一種靜態既警匪片，可以將呢套戲作為一種前奏黎睇。有一樣野真係要彈既係攝影，佢為左加強真實感同埋張力，經常將個鏡頭震黎震去，zoom下又pan下，又左又右，真係好煩。仲有一個枝節要彈既係：做咩要介紹梁家輝個師父出獄呢？咩用意？

我一直都唔係幾明英文片名Eye in the sky既意思，任達華話呢個係surveillence原有既解釋，我覺得係解得通，但可以有更好既字去代表跟蹤既意思，直至到最後梁家輝自己撞到鐵勾入頸而死，我先明白Eye in the sky係「天有眼」既意思，可以留意下梁家輝所殺既2個警察，同埋整傷任達華既都係頸既大動脈，佢自己既收場亦係一樣。呢一點可以話係編劇畀我既小小驚喜。

重返香港

因為轉新工既關係，而又冇得係之間放假既情況下，我決定放棄我既CFA II考試返香港行一轉。

4日實在係好短，好彩約得到幾多既人出黎食飯，4年冇見，上次都只係返去搵佢地影畢業相，而家個個都有野做，有D仲買埋樓要結婚添。

4年前返去就講八卦野多，今次返去會講下其他野，講下做野，講下結婚大計，講下神話(!)，講下旅行，好奇怪4年冇見仲可以好投契。

返到澳洲之後忙左一個星期，為左離開Deloitte要準備，之後係12號返新工，公司只有4丁友，個個都有家室有仔女，加上以前係Deloitte，我會同同事講下笑，吹下水，而我要大約6個月去適應一個新地方，可能個由香港到澳洲個落差得太緊要，所以返黎之後都有D空虛既感覺。

可能會係2個月後去上海做野，到時我又會點呢？會唔會畀人排斥？會唔會做唔黎手上既野？

本來好想有一個轉變，不過而家反而有D躊躇......我做得o岩唔o岩呢？

不過而家後悔就太遲喇，頂硬上啦。