上海初探(下.....但未完)

我一直都以為呢度係我既私人廁所，所以我盡情地係度「發洩」，點知原來呢個廁所係有人睇既，仲會私底下問我：「喂，痾成點呀，我見你痾左一半唔痾既？」冇錯，問既就係我究竟係上海發生左D咩事呢？

所以有時真係要寫D古怪D既故仔吸引下讀者。

XXXXXXXXXXXXXXXXXXXXXXXX

到左衡山路，隨街行下，不時有D扯皮條會抖下你咁，當然我就當時運高睇唔到啦，最後係間冇咩人既「Energy Bar」坐低左，叫左枝喜力飲。

我都唔知點解會入呢間Bar，人係真係冇乜，仲好「Up dup」添，可能我潛意識係一個唔鍾意群體生活既人，潛意識揀左呢度都未定。

酒吧其中一個拳手走過黎撩下我，我就聽從A姐既吩咐扮只識講英文，同呢個靚妹仔溝通係上黎。妹妹仔小小肥，不過係幾cutie既樣，英文.......ok啦，知道佢叫Katrina。

唔知點解係中國大陸(同香港)周不時會見到D好騎呢既名，有人會叫自己做Eleven (真事，我甚至有卡片添，係我坐係地產代理個度趁人唔為意係台度順手拎既)，有人叫自己做Kawaii(以為自己可愛？)，好彩呢個個名正常D。

傾下計問下佢讀咩，竟然係讀美術，仲係攝影添，即刻加左d好感，不過始終要扮講英文，變左好多野講得好片面，期間佢都有盡佢做拳手既本分叫我請佢飲酒(Bailey)，不過技巧生硬！我唔係成日去Bar都睇得出，我自己就扮等朋友係度同佢吹吹水咁。不過睇得出佢對我有少少好感，後尾開始問有冇女朋友呀之類既問題，我又當然問返佢有冇男朋友既問題，佢話冇，我就見時間已晚，話星期六日打個電話佢睇佢可唔可以出黎帶我周圍行咁啦，咁就成功拎到電話！我留低左我既卡片，佢睇落幾高興咁。

就咁，我就返左酒店喇。

導火線

係上海睇既第一套戲就係呢套導火線。

本來想去上海電影城睇既，點知收錯料去錯站，本來諗住晏晝只係去上海書展既，又畀我係天山電影院搵到場5點鐘既，橫掂係書展都冇咩收穫(一本書咁大把)，就去睇下啦。

間戲院係好殘，好70年代個種，旁邊坐住一對60-70歲既老夫妻，睇得好投入，見有斬手斬腳既場面會發出不屑既聲音，我呢D睇慣戲既就滑左「啞」，冇咩反應。我睇戲都已經變左習慣，冇個種好投入既感覺，好多時有D好突然又或者好血腥既場面，全場都「哇」一聲既話，我個心都會同自己講「做戲o者」，唔好咁投入。或者我要學下呢對老夫妻咁先可以再返入去睇戲應該有既心境。

講返套戲，賣點係甄子丹，佢由殺破狼帶畀大家既巴西柔術風格我覺得係幾新鮮，所以佢今次都係做返馬Sir，做返佢殺破狼既事。不過冇左洪金寶，冇左吳京，就單薄左D，你會覺得呢套戲係甄子丹幾自戀既作品，有好多佢既特寫鏡，扮李小龍既動作。自戀還自戀，甄子丹既演技都仲係好生硬，不過賣點係動作既話就冇咩好講喇。

當然，我會唔習慣睇香港戲聽到普通話配音，又或者冇端端好似cut左D戲咁(應該係古天樂同范冰冰既床戲)，行過家樂福，發現有呢套戲既DVD，下？好似未落畫架喎？咩呢度係咁既咩？我係唔係應該支持BT呢？！

上海Setup

經過一星期既舟車勞動，終於係上海中山公園附近搵到個竇，近地鐵站，附近又多野食多野買。

新居唔錯，除左我唔多習慣呢度既廁所！原來係唔可以擺廁紙落去既！攪到個廁所塞左自己頂硬上通左一陣，通唔掂決定用$30搵人解決。

同管理處講我住係咩單位，我住第7(qi)座，點知講左第4(si)座，上樓過左大半個鐘都唔見有人黎就落去問下啦，終於知道自己攪錯左，攪返掂之後就上樓等。終於個技工黎到，一開門就大罵「你耍我o也!........」都唔多知佢罵咩喇，不過就連聲陪不是，畢竟係自己普通話差，又整塞左廁所。我覺得唔係畀左錢就大晒，一定要佢有好既服務態度，我同佢都係人，都係打份工o者，唔係話一定要受你氣架，而家西方國家將個個服務態度擺得太高，令到D顧客就橫蠻起黎，風氣唔係太好。

再講返之前，搵樓個陣搵左個agent幫手搵，咁事成之後就請佢食飯啦，畢竟之間有好多枝節野發生，又要佢改contract又黎我office簽約(因為係我公司簽唔係我簽)，期間識左agent韓小姐同埋業主個外甥女小夏。食過一次飯，飲過一次野，感覺上覺得內地人都幾易相處，不過當然我仲要時間練習普通話啦！

係上海時間仲長，呢D野始終會習慣既。