煲劇 - Prison Break

我以前好少睇電視，好細個個陣阿媽唔畀追劇集(除左放暑假個陣)，大個之後就對TVB劇集冇興趣，因為TVB劇集多數係倒模倒出黎(關於呢個TVB劇集模......容後再講)，係香港會追一D鬼佬劇集，X-Files, ER, Friends, Spin City......佢地多元化D，攪笑又得，正經又得。

直到我過左澳洲之後就冇追喇：一黎我睇完第3輯，佢就播緊第5輯(喂，你係香港要配字幕同Nicam嘛)，二黎冇字幕！ER呢D真係睇死你，講一大輪Jargon你都唔知佢想點。

黎到上海後實在係冇野做，但當然唔可以自甘墮落，出面花花世界唔係一定要出去既o者，所以會係街邊買DVD黎煲，o岩o岩睇完Prison Break，Heroes，而家睇緊House。

Prison Break Season 1係個好引人入勝既劇，我呢個人唔可以專注係一個問題上多於2個鐘，唔可以睇一半書多過2個鐘，唔可以玩同一個遊戲多於2個鐘，我一定要Multi Task，不過我自覺對PB既專注力可以幾好，可以一次過睇3集 :).

PR既主線好強，整套劇圍住個主線 - 逃獄去行，當然係有支線，但所有支線都可以同主線有關係，雖然我唔鍾意呢套劇集講陰謀論，講到政府、總統呢家野，你一玩呢D就只會愈玩愈大，大到收唔到科，最後要搵個理由黎推砌：殺手後面有組織，組織後面有副總統，副總統做埋總統，跟住呢？你只可以繼續去吹水，吹到個氣球爆喇你先心安理得。聞說第3季收視唔理想，我睇原因都應該係呢樣卦？

彈完之後又要讚返(辨證法嘛~~~~~~)，另一個吸引人既地方係呢個逃獄既團隊入面既人各懷鬼胎，形成一種好強既張力，大家呢一刻一齊合作，下一秒又你勒死我我勒死你，好喇，差D勒死你之後大家又搭膊頭 Friend返，編劇要好好功力先可以搵到一D合理既原因令到佢地既行為合理法，否則做得差既你只會覺得佢地搵戲黎做，但PR既編劇係編得幾好既。

當知道第3集收視麻麻既情況下，或者唔會有太大興趣去追第二季住，畢竟想留個美好回憶畀自己。

P.S George Lucas (星球大戰創作人)話佢唔再做電影，因為佢見到做電視更加有可為。而家電視劇集既整作可以同電影相比，而且有更多時間去develope人物角色，而觀眾層更大，我而家開始明白佢既意思。