2008年上海電影節 - 如月疑雲

黎到上海之後第一次上電影節，本來想睇東邪西毒終極版，點知已經sold out喇！

千揀萬揀(去imdb逐個睇評分)揀左呢套為第一套睇，故事大概係話少女名星如月自殺逝世一年，5個fans聚埋一齊去懷念佢，係經過一輪抽絲剝繭下，終於搵到如月死既真相！

本來以為係一套偵探片黎既，點知一睇片頭就知係一套搞笑既片，心情涼左一截，再加上安排失當，個字幕機出唔切D字幕，係播左10分鐘後被人大叫「重播！」，所以多多少少影響左睇既心情。我到而家都唔明，將字幕嵌入去電影度唔係D咩新科技丫，點解要專登整個字幕顯示牌，駁埋電腦做呢？

講返套片，我個人認為應該係做舞台劇好D！因為2個原因，演員用左一個比較誇張既演技黎做，係可以用浮誇黎形容，第二，就係場景基本上無變過既！除左回憶個陣用左D好似剪貼式既方法黎表達，係幾得意同埋加分既野。

至如個plot方面，其實係ok既，最後都合理咁推到個結論，都叫有少少驚喜架啦，最後就整多場如月生前表演既一首歌，但係演如月既呢位少女呢.......就肥膩左D喇................:)

假如唔係D浮誇演技同埋日本仔例牌既低能感人對白之外呢，應該都可以有75分既，但扣左分......60啦！

And 1

呢個世界有人係完美主義者，有人做野又馬馬虎虎得過且過。

完美固然要付出代價，馬馬虎虎又會影響你既仕途。

我對於「呢件事我究竟要出幾多力？」呢個問題有以下既見解

假如而家有一個準則，100分係滿分，普通人多數做到60分，我就會做60+1=61分。

首先一樣野，你做100分既代價係好高既，大家都知咩叫reducing marginal return：假如你聽日要考試，而你係未溫過既話，由而家開始溫，可能你溫5個鐘就可以合格，平均1個鐘marginal return 10分。

要考100分，你要溫既範圍就要廣泛得多喇，可能要50個鐘你先可以考100分，平均1個鐘marginal return 2分

對於呢D過左關就得既情況，我只會要求合格再加上一個safety margin (+15分)咁就冇問題，所以我係Uni係拎credit average既。(咁當然出到黎社會搵工，credit average就見少好多工喇，不過我相信工作經驗係重要過學校分數)

對住一D要同其他人比較既情況，我就會保持我既+1政策，唔洗做好你好多，好你少少就得喇。

要知道考核一個人，考核人個個一定要比畀人考個個叻你先可以知佢實際有幾叻，所以從來都係大學生考中學生，中學生考小學生，小學生考幼稚園生，倒轉係唔work既。

假如考核你個個係只有60分功力既話，你考100分佢都唔會明白個extra 40分既野，佢係知你好過佢，但佢係唔會知好佢幾多

所以假如你考61分既話，你就可以畀人一個印像就係你好過佢，至於好佢幾多？佢都話唔盡，佢知僧介乎於60-100分之間，咁好有可能佢會揀個中間數80分。

你付出61分既力而得到一個80分既印象咁咪賺左19分既力囉？
如上，你付出100分既力考100分，人地都只會以為你考80分(因為人地只有60分既功力去評核人)，你咪變相蝕左20分既付出囉？

所以，+1政策既好處就係以最少既努力獲得最大既結果。

就算唔從個人角度講，從群體角度，+1政策都有佢既好處
而假如你開始做到60分，見到人地好過你，你當然會想做得比佢好，咁你就會做做做，做到62分。做到62分後你就會發覺原來人地只有61分料，你就會係62分停落黎，而原本61分既個位人兄亦會去63分，跟住又到你去到64分，如此類推，直到其中一位到達佢既頂峰為止。

假如你一開始就考100分，其他人點進步都係發覺100分既呢位遙不可及既話，你仲會有動力去進步嘛？可能你連踏出第一步都唔會。

所以嘛，我一定唔係一個完美主義者，我自己會評價自己做一個功利主義者。

註：And 1係一個籃球術語，指球員係得分後再有一個罰球機會。

互相理解

上個星期返香港，同友人講開關於佢同佢男朋友既事。朋友同佢男友有一個好多情侶都遇上既問題─

以為對方了解自己→以為對方明白自己既暗示→期待得到回應但得不到→唔開心

試問呢個又點會係情侶先會遇上既問題丫？基本上所有人際關係都有呢一個共同問題─

子女期待父母理解自己既叛逆，父母期待子女理解自己既苦心
朋友期待好友理解自己既苦況，好友期待朋友理解自己既限制
下屬期待上司理解自己既付出，上司期待下屬理解上司既立場

~~~~~~~~~~~~~~~~~~~~~~~~~~~~~~~~~~~~~~~~~~~~~~~~
我不禁要問，真係咁難理解嘛？
苦思既答案係：

真係好難理解。


設想一樣野，我眼中既世界同你眼中既世界係一樣嘛？
我眼中睇既天既藍色，同你眼中睇既天既藍色係一樣嘛？

試想下一個以下思想實驗：

設想我係一個有「底片眼」既人，即係假如你影相(用傳統相機)，你有一張底片，底片既顏色係同真既顏色完全相反既，正常人睇到既野係我眼中其實係變左底片顏色。
問：我有可能知道我既眼同正常人有唔同嘛？

唔可能。

你指住白天，話白色，話同白兔既顏色係一樣，再指住調色盤上既白色，話呢3樣野係一樣色

我睇到天、兔，同調色盤上面既顏色都係一樣，只不過係我眼中，你既白色等於我既黑色。

我諗左好耐都諗唔到一個方法可以令擁有「底片眼」既人知道自己同其他人唔同既方法。

有底片眼唔同色盲，色盲既人分唔到某D顏色，係可以用test試出黎，但你仍然分唔到究竟我睇既顏色同你睇既顏色係唔係感覺一樣。


連物件一個最基本物理性質咩顏色我地都不能完全溝通的話，點解我地可以完全溝通我地既感覺？

~~~~~~~~~~~~~~~~~~~~~~~~~~~~~~~~~~~~~~~~~~~~~~~~
10年前睇EVA 新世紀福音戰士，已經被以下碇源堂既呢一個quote說服左自己:

「真嗣，你不必試圖瞭解我，人和人之間是永遠無法互相瞭解的，人，就是這麼悲哀的生物。」

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

不能完全溝通唔等於不去溝通，以上既分析既目的在於唔好要求其他人能予想你心入面既諗法，你有咩諗你就要講，唔代表講左就會明，但至少你做左所有溝通既necessary steps。

當然有人要問，講左出黎就冇意思啦。

咩都要付出代價既，無疑假如我係唔出聲既情況下你明白我諗乜係一種莫大既歡喜，但你所要付出既代價就係你有可能因為人地唔明白而唔開心。

開心既代價就係唔開心，There is no such thing as a free lunch。