個人性與和諧

每個人係社會入面都係一舊磚。
社會係一幅用磚砌成既牆。

對於牆黎講，所有磚都係四四方方，冇稜角既咁就最好。

對於一個砌磚工人黎講，佢既工作就係砌磚牆，所以佢最唔鍾意既就係呢D咁有特色既磚。
呢D咁有特色既磚一係砌唔到一幅牆，一係砌到都唔靚。

對於教師黎講，佢既工作就係砌社會呢個磚牆，所以教師又或者學校係最經常琢磨我地既地方，將我地磨到四四正正，將每舊磚既顏色都調到一樣。
試想下，點解我地要著校服？要守校規？唔可以染頭髮？唔可以有特別髮型？因為我地要同其他人一樣，咁樣牆先容易起。

但對於舊磚黎講，我四四方方同你四四方方又咩分別？我唔想只做一舊磚，我要其他磚認得我呢舊磚，記得我呢舊磚。

要人地認得你，你就要有特質，你既特質就係你既外表、衣著、飾物、談吐、見解、思想......簡單黎講就係Likes and Dislikes。放返落磚既例子就係舊磚既顏色、花紋、質地、形狀等等。

任何野都有代價，你要D磚四四正正，佢地就一定唔會有個人特色。假如佢地有特色，代價就係度牆唔穩固，肉酸，即唔和諧。

社會而家要求和諧既程度已經到達一種非理性既程度。
咩叫理性既和諧程度？
理性既程度係指我地唔容許有歧視、唔容許我地去攻擊人等等。

不過而家，追求和諧已經變成追求庸俗，邊一個叻仔叻女，做D野有多少唔同呢就要攻擊佢，棒打出頭鳥：

************************************************************
你唔可以去睇哲學科學數學書，你睇既話你就係扮高深，你要同我地一樣睇八卦雜誌先叫做和諧。

你唔可以去評論電影，睇戲睇完就算啦，去花時間去做資料收集係On9！寫影評就更加係痴線啦，你懶咩勁呀，係唔係睇唔起我地呀？拿，咁樣唔和諧喎！

你寫咩文畀報紙登呀，你寫到我寫唔到即係睇唔起我地啦？唔和諧喎！

你得閒又做咩寫Sudoku solver呀，寫咩紫微斗數 program o者，又懶係野咁，同我地去DFO買衫落D溝仔溝女啦，咁樣就和諧喇！

************************************************************

學無間道黃Sir講：

世界唔應該係咁，做人唔應該係咁。