千言萬語
考完CFA，空閒時間頗多，可以有時間打返以前想寫既野。
1個月前度睇左千言萬語呢套戲，對呢套戲本來冇乜認識，只係知道以前拍三級片，最近私生活一塌糊塗既李麗珍竟然憑呢套戲拎到最佳女主角，實在有D驚奇。
係睇戲之前google下，知道呢套係許鞍華既戲，許鞍華係少數係香港拍戲「有野講」既導演，呢套片既題材亦係比較特別，講香港社會運動。香港人一向政治冷感、自私，許鞍華今次係選材係真係行偏門左D。
基本上本片有3條主線，一方面用莫昭如舞台劇略講香港社運代表吳仲賢既故事(莫昭如係吳仲賢既朋友，係吳仲賢死後，莫昭如制作左「吳仲賢的故事」舞台劇)，呢個主線雖然係最先登場，但效果最差，同其他2部份連接得唔好，好突兀，我明白到吳仲賢有佢既地位，但或者可以用劇中人物既對話黎帶起呢個人，呢戲入面以舞台劇個種誇張既形式黎論及呢個人，始終係呢套片既敗筆。
一方面講謝君豪飾演邱明寬同埋黃秋生飾演既甘神父既社運活動。甘神父好明顯係甘浩望神父既寫照，佢以一個神父身份為弱勢社群爭取權益，佢既方法有D似甘地，以絕食抗議為主，呢點同邱明寬有好大既對比。邱明寬同甘神父一直都係戰友，但係邱明寬係抗爭後期開始知道自己人微言輕，所以參選區議員，希望以自己既權力為人爭取權益，但亦因為咁，所以佢同甘神父既路向開始有分歧，邱明寬開始唔鍾意甘神父既絕食抗議，認為會影響長遠黎講既戰略，但同時間佢仍好妒忌甘神父，因為甘神父所做既比佢自己更為崇高，冇被權慾所影響。
最後一條主線係講李麗珍飾演既蘇鳳娣、李康生飾演既李紹東同埋邱明寬既關係。娣一直暗戀寬，但基於寬已經結婚，所以佢地發展左一段婚外情既關係，而東則一直暗戀娣。寬係做左區議員同埋結婚後，同娣發展既關係可以同佢係上面既主線，被權慾所影響，引至自己墮落既主線相互配合，講出社運既人都係普通人，佢地雖然敢於爭取公平公義，但一樣有情慾、權慾，寬無辦法保持自己內心既潔淨，更令到娣懷孕與及之後強姦左娣，都充分表達出呢種表裡不一既矛盾。至於東，則係一個心地純潔既人，為左娣奔波勞碌，本身少講野既佢，對於娣既感情、對於寬既憎恨、對於社會弱勢社群既同情，佢係戲入面都冇乜用個口表達出黎，但係就可以從佢既行為上面睇得出，例如佢陪娣去墮胎，係娣失憶期間照顧娣，又或者佢係知道生果檔工人非禮弱智女童之後去教訓人(而家唔係太記得清楚，不過呢段應該係娣被強姦之後，可以視為東對寬既泄忿)，呢D都係影片名「千言萬語」既其中一個含意。
正如第一段所講，許鞍華係香港少數拍戲係有含意，有meaning既導演，呢套戲主要以描述劇中人物為主線，社會運動之不過係一個舞台，但希望唔好嚇親一D想睇既人，以為呢套戲好悶，因為黃秋生同埋李麗珍實在係演得好好，尤其係黃秋生，扮一個意大利藉既神父，個種口音，個種有D傻氣，唔係咁醒目既神態，真係好襯呢個甘神父既角色，李康生初次登場，佢個個樣係一D好平凡既樣，係好o岩做一D比較基層既人物，表現都唔錯。
誠意推薦呢套戲。
posted by FANTUS at 11:04 pm
0 comments
