印度遊記 (一) - 奇蹟的機票

↑攝於新加坡璋宜機場

上回講到我有可能星期二先可以出發，星期六，亦即係我預定出發既日子，本來係諗住一大早出去City打埋支防疫針，晏晝執行李，夜晚去機場，但因為冇機票就冇心機，冇心機就留係屋企Hea下喇。

班機係預左夜晚10點半起飛既，我晏晝5點半係張床上面，又唔係訓覺，只不過唔想做野，老媽子叫我出去剪草，我橫掂冇野做就出去剪啦。我由車房推住架剪草機去屋企門口，見到個女人推住架BB車，佢見到我個陣就問我係咪姓NG(當然，用英文啦)，我心諗莫非佢拎左我封信，就馬上答話係啦，果然，佢話佢收到封寄去佢屋企既信，不過收信人佢就唔識得，佢之前幾日都去左外地旅行，所以冇為意！我即刻同佢返屋企，見到封信，的的確確係Express Post！係Baneesha寄黎既！佢寫錯左我既地址係4號而唔係8號！我即刻拿拿聲講多謝跟住跑返屋企，開始執野，Send SMS話畀Baneesha聽我照原定計劃出發，打電話問可唔可以上機，之後沖涼食飯出發！


一齊順利！我成功搭到班機到Singapore，再係Singapore Airport等左6個鐘後再搭上印航既機去印度，到達之後出到去接機區域，見到有個印度人拎住個牌寫住我個名我就知佢係黎接我既司機，佢車我去酒店，沿途所見，我對印度既印象就係落後，D車唔守規則，Cut 線唔打燈，而以響安黎代替打燈，我見到有男人係路邊痾尿，我見到有街童係街幹活、畀人用皮帶打，DoDo(一種好似的士既交通公具)超載、...... 係一D我未見過既景象。

到達酒店，大概晏晝3點，個酒店職員話畀我聽我D朋友出左去，大概4點返，我用個一個鐘執執行李，跟住就問酒店職員最近既Market係邊，自己行出去買D野。

我去既Market叫做GP1 Market，有D似香港女人街個個特色，入面多數賣衫多，我行過一間士多，入邊睇落幾多野買，就去入面買左D水同埋餅乾。跟住行左一個圈之後就行返去酒店喇。

返到酒店冇幾耐就有人黎拍我門，係同事阿Jay！我話畀佢聽我奇蹟地咁搵返張機票，佢都好(乙水)我開心，跟住我同佢同埋一大班係澳洲去既Baneesha朋友去一個叫Baha'i Faith House of Worship，又名蓮花寺。

(未完，下回續)