伊沙貝拉

send email去叫人同我去睇呢套伊沙貝拉，有人問我邊個做架？我答佢話係Chapman To 同 Isabella (返緊工，梗係打唔到中文要打英文啦)，佢問我Chapman To係邊個，我答"Silly Keung From Infernal Affairs" ，佢就話唔想睇喇。

我都明而家太多杜文澤實在係有D反感既，例如電影頒獎典禮可以唔記得頒獎嘉賓仲笑得出，就真係過分啦！不過我仲會畀機會畀下人既，我都唔鍾意占基利架，不過佢做既無痛失戀又的確係好喎。

杜文澤今次正正經經做，叫做得唔錯架喇，Isabella就生硬囉，同埋我唔鍾意佢把聲，不過整套戲個氣氛唔錯，表現到杜文澤個種對以前情人個種追悔，同埋一個男人最後要承擔責任個種胸襟。好明顯地，彭浩翔係想將杜文澤攪大人個肚，同埋幾十年後佢貪污既事係呢套戲入面串埋，十幾年佢不負責任咁樣離棄佢既情人，到之後遇上一個以為佢係生父既女仔，明白到負責任呢個道理，去自首。故事其實留低左一個伏筆，就係杜文澤去完法院後留係佢個女件衫上面既污漬，係咪代表佢都有肺癌呢？同佢舊情人一樣有肺癌？呢個故事就冇交待到，留畀觀眾去發揮。

呢套片係柏林影展得到配樂獎，如果大家留心一下，好多故事場景都係演員無對白，只係靠畫面同埋音樂去交待劇情同埋人物心態(例如，搵返狗仔一幕)，金培達今次能夠衝出香港，實在係值得慶賀。