今次係德國片，奧斯卡最佳外語片《竊聽者》，係一套水準好高既片，加上電影最高課題：人性，係絕對值得睇既片。
故事講1980年代東德秘密警察組織Stasi 既特務Wiesler 被獲派去監視名劇作家Dreyman。Wiesler係典型既德國佬，寡言、機械化，專業(一眼就睇得到Dreyman唔係好野，係大學教授盤問技術並視之為藝術)。Wiesler並唔鍾意呢個任務，因為呢個任務係為左搵Dreyman痛腳，而令到一個東德既一個委員長可以擁有Dreyman既女朋友Christa Maria。
係偷聽期間，Dreyman既老師自殺，Dreyman係悲痛之下彈左佢老師送畀佢既琴譜《Sonata for a Good Man》，並同佢女朋友Christa講：知道關於這闋曲，列寧說過什麼嗎？他說，如果讓我一直的聽，我將無法完成我的革命……聽過這曲子的人，我是說真能用心聽的人，會是一個壞人嗎？」
Wiesler聽到琴聲之下受到感動，開始左佢既轉變，佢開始富有人性，由以前既一絲不苟，變得有感情起黎：例如到酒吧說服Christa Maria唔好去見委員長，係電梯入面聽到男孩講對Stasi唔尊重既說話都冇出聲，甚至乎，係偷聽到Christa Maria同埋Dreyman交歡之後自己去召妓等等)
但Dreyman因為老師既死所以想揭發東德自殺數字高既醜事(因東德自己知自己事，所以一直都冇公怖呢個數字)，佢安排左一個特製既紅墨打字機，收埋左係地板下面(因所有東德打字機都會被註冊)，用左幾個星期既時間去安排佢寫既文可以係西德明鏡雜誌上刊登。Wiesler知道佢既危機好大，本來想告發佢，點知見到自己個個趨炎附勢既舊同學波士，心入面涼左一大截，所以轉而冇告發Dreyman，而且仲叫波士畀佢全權負責，令到佢既同事唔洗監測Dreyman，並且仲係自己既report入面編造左一個慶祝列寧50年既故仔，令Dreyman可以做佢想做既野。
Dreyman最後出左個篇文章，但就令到東德政府大為頭痛，並捉左Christa，叫Wiesler去審問Christa叫佢透露邊一個係篇文既作者。呢一幕好有張力，因為Wiesler一方面要交差(畀佢上司監視住審問過程)，一方面又係言語上暗示Christa自己係幫佢既，希望佢唔好講。可惜Christa唔記得係酒吧見過Wiesler，又因為唔想自己既演戲生涯告終，所以出賣左Dreyman。
Wiesler係危急之下早一步到左Dreyman屋企將打字機搬走，上司到場搜打字機，Christa 就係個一刻感到冇面目見Dreyman所以衝出馬路自殺，而因為搵唔到打字機，偷聽活動告終，而Wiesler既上司懷疑Wiesler出賣國家，所以將佢貶左做開信封既工作。
東德係1989年解放之後，Dreyman重遇前東德委員長，Dreyman好天真咁
問點解佢唔係受監聽既一人，委員長話佢知佢一直都受監聽，叫佢睇下屋企個個電燈掣。Dreyman係屋企搵到監聽器，好奇怪點解佢當年可以咩事都冇，所以去左Stasi既機關(而家娛左博物館)查究竟係發生咩事。
佢搵到編號HGW XX/7既Wiesler，睇到Wiesler幫佢編造既故仔，睇到Christa出賣佢既證供，更睇到Wiesler係文件上留低既紅色墨水跡，知道呢個HGW XX/7就係佢既救命恩人，之後見到佢係街上面做派傳單既低下工作，感到唔太可能可以以面對面既身份同佢見面，所以佢就走左。
2年後Wiesler係書局門口見到Dreyman既新書，書名係當年感動佢既曲譜名《Sonata for a Good Man》，書既開首係
"To HGW XX/7 with gratitude"
※※※※※※※※※※※※※※※※※※※※※※※※※※※※※※※※※※※※※※※※※※※※※※※※※※
呢套唔係動作片，冇爆炸冇打鬥，但係一開場至結尾個個張力都好夠，觀眾一直都好似東德人民咁每一刻都感到蹦緊，尤其是Wiesler審問Christa個一場，可以話係將個氣氛推到最高峰。導演亦都希望留返一D好回憶畀觀眾，本來可以係Christa自殺之後就黎ending，但係佢刻意將觀眾個個情緒降下溫，收慢左個步調黎表達出Wiesler既好下場：係結局入面，書店職員問買書既Wiesler究竟本書洗唔洗包？係唔係送畀人架？Wiesler答：
"It's for myself."
同片名《The Lives of Others》構成對比：Wiesler其實係可以自私一D，唔需要理會其他人的生命，但係佢所造既一切，除左係幫左其他人既生命之外，仲係為左自己既救贖 ，為左彰顯人性既一面，呢樣野就係本片既主旨。
中國大陸近黎經濟發展好快，但人命仍然係好唔值錢，希望本片可以畀呢D人一D反思既機會。
