門徒

爾冬陞既戲一向都寫實為主，係呢套門徒入面我地再一次見到佢寫實既表現。

我自己真係好似未見過港產片係製毒方面描寫得咁細緻，再加入去到金三角度實地拍攝，呢方面已經絕對above expectations。

另一方面，就當然係呢D黑幫片既新潮流 ─ 亦正亦邪既描寫。以前既黑社會片多數係正邪兩立，好容易睇得出邊個忠邊個奸，唔知由幾時開始(無間道？黑白森林個堆？)就開始多左呢D比較人性既表現。忠，唔會全忠，奸，又唔會全奸。

睇返門徒，劉德華所飾演既大毒梟坤哥本身有佢賣毒品既理由，你可以從佢既對白之中睇出佢係受過教育既人：係「廚房」鬧製毒師傅唔識化學，同吳彥祖講毒品係供求問題，又或者到最後，意識有D迷糊之間講1除3除唔盡既問題，因為佢受過教育，所以佢會自己編一D藉口去掩飾佢所犯既事。

廖啟智扮演海關探員，一知道自己即將破獲製毒工廠即刻獸性大發，「打尖」想搶揖毒既功勞，最後落得斷手既下場。吳彥祖既上司表面上話好賞識吳彥祖，但到同劉德華一場審問，聽到劉德華話會報料可以令到佢升職，即刻畀佢同袁詠儀見面，到最後吳彥祖回復警員身份，佢同另外一個上司其實都唔太著緊佢，將佢當係棋子一樣。

張靜初既單親媽媽亦都有帶畀觀察矛盾思緒，究竟佢抵唔抵可憐？係唔係佢咎由自取？

係呢一連串矛盾之下，吳彥祖最後落得空虛既下場，係張靜初舊居個張「同屋企格格不入」既梳化上面，做到自己警員格格不入既事：自己拎起針筒吸毒。

最後，只有戲入面既小妹妹最清醒，若無其事咁將針筒扔左入垃圾桶。