末代皇帝溥儀

末代皇帝溥儀係係香港買既另一戰利品。

久聞貝托魯奇既大名，今次係第一次睇呢套大片。

唔洗問，成套片都係講清朝最後一個皇帝溥儀既一生，而導演所側重既係關於溥儀一生都作為囚犯既遭遇，據貝托魯奇既話講，呢個係一個關於囚犯既故事。

溥儀3歲登基，而年紀小小既佢作為一個小朋友，佢當然想出去探索，不過礙於佢皇帝既身分，佢被困於紫禁城，就連佢親生母親過身都唔可以去探佢，所以引發左溥儀走上屋頂情緒波動一幕。

以上既只係活動自由受到制約，溥儀其後希望整頓內宮，防止太監私自偷賣名貴國寶，決定欽點大臣去做關於國寶既目錄，太監為左掩飾其所為，所以一把火燒左建福宮，縱然最後溥儀決定將紫禁城太監全部趕走，但已經為寫日後溥儀作為「一國之君」但又無能為力既坎坷生涯寫左伏筆。

其後係1924年，馮玉祥軍隊包圍紫禁城，趕溥儀出皇宮，而係日本人既幫助下，溥儀去左天津。日本係侵占中國東北後扶立滿州國，溥儀明知日本人利用佢但都願意幫日本人，就係因為佢仲係想做皇帝。可惜，佢只係日本人既傀儡，所有大小事都要經日本關東軍同意，戲中所寫既關於溥儀係發表演說希望可以同日本日皇平起平坐，在座既日本人即刻唔畀面離席，又或者日本人逼溥儀承認汪精衛為國務大臣，當面係佢面前揭發婉容皇后同司機私通既事，都係對溥儀作為一國之君但又處處受人制肘，作為囚犯既一種表現。

日本隨後戰敗，溥儀係逃亡既時候畀蘇軍所擒，其後被視作戰犯係管理所受再教育同改造，呢個時候，佢真真正正咁成為一個囚犯，不過唔同既係，佢甘願留低。佢係監獄入面認識到自己係同日本人狼狽為奸既時間，自己既滿州國「國民」被日本利用黎做生化武器既實驗品，見到日本人係南京進行大屠殺，佢甘願留低贖罪。

最後，溥儀出獄成為中國公民，佢既職業係一個園丁，原本以為重獲自由既佢竟然撞o岩文化大革命，一個控制人思想既年代。直到最後一幕，係1967年佢以遊客身分返到紫禁城，畀管理人既仔佢登基時既禮物，一個困係蟋蟀筒入面既蟋蟀。奇蹟地，隻蟋蟀冇死，並爬出蟋蟀筒，係呢個時候，管理人既仔發覺溥儀唔見左，而o岩o岩入黎既旅行社導遊就講溥儀已經係1967年逝世，用隱喻既手法講出溥儀到死先可以享受自由。

一開始睇既時候覺得好奇怪點解係講英文？我一直都唔多鍾意咁樣九唔搭八既配搭，例如藝妓回憶錄咁，日本故事講英文，總有種突兀既感覺。用英文寫劇本你就要就住演員，唔可以用太深既字，戲入面只有演川島芳子既個位女演員先叫做流利既英文，其他中國演員你都可以聽到個一種唔太自然既語音。因為咁樣而令一部大作減分係有D可惜既。

有一樣極之值得讚既就係配樂，最出名既當然係David Byrne作既主題曲啦，亦係阿梅夢裡共醉既曲子，但我更鍾意既係板本龍一作既呢首傷感既曲(我鍾意幽怨既歌)，以下係youtube入面搵到既。

http://www.youtube.com/watch?v=foOZ3oXuR-w

當然，仲有就係溥儀登基時既特大群臣參拜既場面，20年前冇特技，個D全部都真係用臨記去拍，而家已經冇難會再見到。

上海初探(中)

上海既第一日，做完DD野之後Julian帶左我去新天地同佢既「朋友」飲酒。

佢既朋友當然係女性啦，一個大連人，名已經唔記得，我唔覺佢有咩靚，不過鬼佬睇中國人既眼光係好古怪既，你睇Lucy Liu靚咩？咪又做Charlie's Angel主角。

好明顯睇得出Julian係好識tum女仔既公子哥兒，鬼咩，一個鬼佬識講國語(可能好過我)，你話會唔會溝到女？

不著邊際咁樣講左幾句，後尾我又回復本性，唔出聲，咁大個發光發熱既電燈膽係度，仲識發聲就唔好啦。

當然後尾就返酒店，因為Julian同我住同一層，我目送住佢地入左Julian間房。

§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§§

第二日

冇咩值得講既，不過做完野後Julian話佢唔舒服，唔出街。
我冇野做上網見到我既舊同學A姐，佢係上海做過下野。

問佢上海有咩做呀？
佢答去衡山路啦，多酒吧多靚女！

好難想像答我呢個答案既係一個女仔，佢仲畀埋貼士：

1)著靚D
2)一定要講英文！
3)11點半後去就多人架喇

橫掂冇野做，就去睇一睇啦我心諗，唔通屈係酒店睇埋本《香水》咩？！

換過一個casual既look，睇一睇地圖，發覺原來搭地鐵就去到，就咁我就出發喇。

上海初探(上)

五光十色既上海，可能就係將來要住既地方。

新工開左唔夠一個月就出差喇，見到幾個同事，有同行既多野講樂觀老闆Bill，成日將D頭髮Jel到最後既馬來西亞藉CFO Stanley，鬼佬識講國語律師Julian，同埋成日笑笑口既中國代表Joe。

我當然係年紀最細既一個，經驗最淺既一個，最正經既一個，我既孤離感又返返黎：

當成班人係酒店房度怒抽紅雙喜牌國產煙個陣，我吸住D二手煙喉頭乾旱，睇住D煙圈升下升下，總覺得自己唔多屬於呢度。

又或者當Julian一個星期分別帶左2條女返酒店個陣，同埋當Joe提議去夜總會既時侯，我都會覺得呢度太過五顏六色，唔多襯我鍾意既黑色。

唔通真係要應天月星之說─跟風跟大隊跟潮流？