Lonely Lonely X'mas

完全唔覺係聖誕。

中國冇聖誕假期，雖然老闆唔係度，我係屋企「返工」都可以，不過我係一D聖誕意識都冇既。呢度朋友都唔多個，而我亦好抗拒係大時大節好似慌死怕畀人地知你自己一個過而夾硬搵D野黎做，搵藉口畀商人去賺你錢，又或者走去睇燈飾而同人迫。亦好抗拒周圍都係聖誕歌，聖誕帽聖誕樹，我最唔鍾意庸俗，聖誕節情人節都畀我一種庸俗既感覺，就係人做你又要做，人食火雞你又食火雞，人買玫瑰你又買玫瑰。我一係去旅行，一係就留係屋企。

以前都會諗下買D禮物畀自己，當獎勵自己一年既辛苦成果，不過今年個deal又做唔成，自己亦冇乜人民幣係手，亦唔想買野到日後離開上海個陣又要搵人接收D野，買野意慾好低。

曾經諗過假如人係拍緊拖既話，你要花既心機就要多D，又要安排又要買野，不過我拍拖個陣2次都冇同女朋友過聖誕，一係我過左香港.......另外一個原因.....唔記得lu.......邊鬼會記得呢D無聊野丫。

細細個最記得就係有一年聖誕節，一起身見到有2盒禮物，一盒畀我，一盒畀我大佬，一拆開黎係變型金剛六變戰士！我大佬就有六變獸！之後就唔記得喇.......而家識賺錢喇，買乜野都返唔到去個一個聖誕節既喜悅，完全unexpected既喜悅。

個次之後我既存在已經不值得世界上任何人為我花一D心思，或者提供一個驚喜。拍拖個陣Ada寄左張Bee Jees CD畀我(因為同佢講電話話我見到有想買)，可惜我已經係幾日前自己買左lu，本來係一個驚喜，一個心思，就被我既個種「自娛」、「唔依賴人」、「自給自足」既性格所摧毀左。

睇孤男寡女，最記得係劉德華最後寫既「I Need You」，個陣心入面有一種悸動，不過我唔明白係咩意思。而家明白到我既性格就係盡量獨立，盡量講「I Don't Need You」，所以就鍾意睇電影睇書影風景，全部都唔需要其他人參與，但咁樣點樣接納一個人入去你既生命呢？之前唯一一次既拍拖亦都唔係「I Need Her」既情況，係我見到「She Need Me」，而我又唔介意所以開始既。我係一個唔鍾意群體生活既人，可惜呢個社會唔鍾意呢D人，佢地會標籤你做自閉，古怪，我又可以點呢？

誰又騎著那鹿車飛過 忘掉投下那禮物給我
凝視那燈飾 只有今晚最光最亮 卻照亮我的寂寞
誰又能善心親一親我
由唇上來驗證我幸福過
頭上那飄雪 想要棲息我肩膊上 到最後也別去麼

Merry, Merry Christmas
Lonely, Lonely Christmas
人浪中想真心告白 但你只想聽聽笑話
Lonely, Lonely Christmas
Merry, Merry Christmas
明日燈飾必須拆下 換到歡呼聲不過 一剎

生日快樂

最近幾年黎，係冇乜愛情片可以撩動我既心，有feel既都係以前既作品：心動，八月照相館，情書等，呢套生日快樂同以上既都係同一類，愛情+生老病死，係我鍾意睇既類型。





我唔鍾意呼天搶地既愛情，睇何韻詩梁祝下世傳奇睇到我渾身唔舒服(縱然我鍾意何韻詩)，又或者睇張學友演唱會，佢有一段歌舞形式既演出，亦係呢種死去活來既愛情，我唔多受落，我係一個realistic既人，鍾意睇柴門文個種既愛情故事。





生日快樂其實故事唔可以話係新鮮，唔知係故事既問題，定還是港產片鍾意畫出腸，我一見到古天樂2家姐有直腸癌就知道故事會點樣去，我留意既係劉若英既演技，同埋每一個"moment"(用劉若英既說法)所畀到我既個種惆悵同埋落寞感。





劉若英唔可以叫特級靚女，但係佢有香港女仔無既氣質(佢係讀音樂既，呢D野係讀出黎既)，有一種成熟獨立既味道，係我鍾意既女仔類型，不過當然一開始要佢同古天樂扮學生都有D唔o岩feel。劉若英做得最好個場戲當然係佢係架車入面知道小南既結婚消息，之後打去畀小南祝福，再忍不住詛咒，之後情緒失控，心情平復，但又失控。由晴天霹靂到冷靜到憤怒到悲傷到控制，再失控，有邊個同劉若英差不多年齡既香港女演員可以做到？我只諗到張柏芝。





用劉既說法，小南同小米除左性格上令佢地唔能夠係埋一齊，其次就係"timing"。呢個係我覺得現代愛情2個人唔可以係埋一齊既common原因(無錯，唔係直腸癌)。以前既愛情故事就係戰火，階級，地理，健康等因素令2個人唔可以係埋一齊，呢D都過時喇。而家既愛情故事應該圍繞住Timing，性格同埋誤會等原因而創作。



呢套戲係張艾嘉有份編劇既，張艾嘉係心動入面所發出既作用今次係生日快樂亦可以睇得見。張艾嘉既角度係好女性化既，係生日快樂入面對小米既描述係比對小南細膩一D，講小米因為細個母親棄佢而去而令佢冇安全感，令佢唔想同小南有更進一步既發展。相反，除左confused之外，唔係太睇得出小南係點睇，佢只係覺得好無從，好難以理解。

呢套戲令我搵返我以前d/l落既心動黎聽：

過去讓它過去　來不及
從頭喜歡你　白雲纏繞著藍天
如果不能夠永遠走在一起
也至少給我們懷念的勇氣　
擁抱的權利
好讓你明白　我心動的痕跡

犯罪的根源

蘋果日報 12月10日

【 本 報 訊 】 治 療 柏 金 遜 症 的 多 巴 胺 促 進 劑 （ dopamine agonist ） ， 在 部 份 患 者 身 上 出 現 極 端 副 作 用 。 法 國 一 名 兩 子 之 父 告 上 法 庭 ， 聲 稱 服 藥 後 「 令 我 變 成 賭 徒 、 賊 人 和 同 性 戀 」 ， 要 求 藥 廠 賠 償 400,000 歐 元 （ 約 460 萬 港 元 ） ， 並 獲 勝 訴 ， 料 此 案 例 將 掀 起 索 償 潮 。 現 時 估 計 香 港 共 有 3 至 4 萬 名 柏 金 遜 症 患 者 ， 醫 生 表 示 ， 部 份 患 者 服 藥 後 也 出 現 賭 癮 和 好 色 的 症 狀 ， 醫 生 須 控 制 藥 量 ， 否 則 隨 時 誘 發 各 種 不 同 的 強 迫 性 行 為 。

---------------------------------------------------------------------------------

假如一個普通人嗜賭、偷野，我地會話佢犯左罪，會捉佢去坐監，會帶佢去勞改，會叫佢去認錯。

但根據以上既判決，法庭認為當事人有犯錯，但係佢既犯錯係因為藥廠同醫生，係藥物本身令人去犯罪，係藥物本身令人去豪賭及偷野。

我並唔反對呢個判決，不過就帶黎一D關於罪既問題要去考慮。科學突飛猛進，我地而家已經可以解釋好多病既成因，又或者解釋到腦既邊一部份同某一D精神病連結埋一齊，就好似呢個case咁，知道咩野藥物能令人更容易去犯罪，咁人既「自由意志」部份又該如何處理呢？

曾經聽聞某D男人生出黎係比較暴躁，因為佢有更高既雄性激素，如果真係咁樣，假如呢d人犯左打人殺人既罪，我地又應該點判？除左起訴犯罪人本身，我地係唔係應該起訴佢父母，話佢父母攪到佢咁樣呢？

我地關於犯罪既概念並無跟住科學咁樣進步，但終會有一日我地要面對一個問題：我地假如無辦法控制我地既基因，我地又應該對我既性格行為負上一個咩程度上既責任？我點樣先叫做犯罪？

係某d問題上，呢個問題已經開始浮面，例如係同性戀問題上。

以前，同性戀係犯刑事法既，但係而家人普遍開始認同同性戀，可以容許佢地有同其他人一樣既權利，更可以結婚添，呢個係因為我地明白到呢個係天生既，就好似報導入面所講，用藥物誘發出同性戀，我地可以接受同性戀本身就係一個比較開通既做法。

但當然有d唔「與時並進」之流(如明光社)，仍然唔肯認清呢d新發現，只係匿係自己個龜殼入面，就好似有所謂地平學會，到而家都相信地球係平既一樣，佢地終有一日會被主流社會當做笑話。