影評 - 林海峰是但up發花癲

林海峰係一個我欣賞既香港DJ，記得當年返左香港做野個陣，朝朝早我係用個收音機黎做鬧鐘既，不過我個陣冇留意我set左去邊個台，我每朝一路換衫一路聽呢個晨早節目，覺得講野個個人D point係有紋有路，係有幽默感既，而個種幽默感並唔係話好似而家杜文澤sell既個種灰諧，又或者係I love u boyz個種.....低B式攪笑，係真係有料既幽默感。

當然，我係抱住期望去睇既，期望佢可以畀到我同黃子華棟篤笑個種滿足感，但係開左場15分鐘我就知出事喇，因為我笑都冇笑過下。後尾直頭係我訓係張床度(係，我係電腦play緊)完全唔睇mon咁樣聽，係冇乜心機聽個隻。問題係邊呢？

首先講攪笑方面，太多既冷笑話喇，又或者阿Jan唔識得發揮某一D既笑料，另外，你亦見到佢既笑料唔會用太多時間黎編排，基本上係好直接既，係呢一句就係呢一句。黃子華講棟篤笑既能力就在於佢可以用15分鐘黎編排一個笑話，又或者可以係成個棟篤笑都可以圍繞住3-4個互不相關既Topic發揮，而佢甚至係可以言以有物，係真係有野，有message想講，我最鍾意既秋後算帳係一個好例子，拾下拾下拾年楝篤笑都可以做到呢樣野，最近既冇炭用就挖苦人(董健華)多，message就少左。但阿Jan呢個就真係冇位可以畀人思考發揮，你同彭羚同你個女既事可以令我有咩啟發？

我其實唔太鍾意佢講太多私人野既，講佢同彭羚同埋佢個女D野，不過呢點我相信有人會唔認同。我覺得係演唱會講自己野(例如許志安講鄭秀文)，都其實係「無料到」既表現，你有料唱歌就唔洗跳舞啦，就唔洗攪性感dancer啦，就唔洗攪舞台效果啦，你想轉移視線對我黎講係冇用既。黃子華係唔會講太私人既野，就算講，你都好肯定佢係度講笑，係度自嘲，而林海峰今次既私人野係唔好笑既，我明白係有感而發，不過冇攪笑效果。

我諗阿Jan都係比較適合每年係叱吒講下D男歌手女歌手，因為佢熟行D，呢個Show絕對稱不上係棟篤笑，不過，佢自己亦都冇標榜係棟篤笑，或者係有自知之明啦，呢個係真真正正既「是但up發花癲」，原來佢冇改錯名。