觀察與奧卡姆剃刀

一直以黎都擅於並樂於觀察朋友既小動作，從而掌握佢地既一D秘密，例如拍拖、分手、暗戀、自卑等我都可以睇得出，好多時同當事人講起，佢地都會否認，話有另外一個解釋都解得通，唔係我諗咁既云云，究竟一個觀察要去到邊度你先可以做決定？

我既睇法係去到邊度都可以做決定，大又好、小又好，總之係異於通常狀態既行為都可以作為判斷既準則，你或者會擔心，會唔會判斷錯誤？我覺得假如你真係觀察到某D野既話，從而作出判斷，呢個行為冇唔妥，有邊個可以完全掌握所有事實作判斷？係唔係唔掌握晒所有野就唔可以作判斷？如果係既話我地好多判斷都唔做得，邊有可能？我都試過判斷錯誤，錯左咪認囉，人生咁長，總有判錯案既情形既，我既判斷又唔會影響人地既，判斷錯又有咩大不了？

一個觀察有無限多種解法，我點知邊一種解法係o岩？呢個時候，就要用到奧卡姆剃刀原則(Occam's Razor)，奧卡姆話假設應該係愈小愈好，假如有2個解釋都可以解得通某個現象，你就應該揀最簡單直接個個，而唔係水蛇春咁長，又要假設好多factor個個。

用數學黎做比喻，假如有2點，而我話畀你知有一條線可以穿過呢2點，呢條線係咩？最簡單既答案當然係直線啦，但我地可以有其他線都可以穿到呢2點架喎，拋物線、雙曲線、圓形、又或者係一條power係9既polynomial(即係Ax^9+Bx^8+Cx^7+...既多項式)，咁多條線，條條都穿過呢2點，咁應該揀邊條黎做答案呢？

用Occam's Razor原則就會話你知係用直線，假如有3點，而直線係唔可以穿過呢3點既話，你就會用一條拋物線黎形容。Occam's Razor就係咁簡單，呢個原則可以幫我地更加容易係眾多解釋入面揀最好個個。