事實是殘酷的

今日無端端同Shaini姐講起佢上星期去retreat既一個討論活動，討論內容係關於人生係命定丫，定係我地其實有選擇。Shaini姐話「選擇組」既其中一個論據係，假如我地真係冇選擇而係命定既話，我地同植物有咩分別？

呢個係一個有效既論據嘛？假如我而家審理一個謀殺case，疑兇將被害人殺死，將其內臟掏出，疑兇將內臟生食，兼且將被害人既屍體隨意玩弄，我作為辯護律師，我話：假如疑兇真係做左以上既事既話，佢就同禽獸冇乜分別，試問人又點會係禽獸架丫？所以疑兇根本冇做過以上既事！你聽完呢個例子，會唔會覺得係將事實扭曲？

一個事實唔會因為佢既nature或者佢既引申而改變，事實就係事實，好似頭先咁，假如控方係有人證物證指模DNA證人兇器......，咁樣就係有力既證據。同樣道理，談論人生是否命定呢個屬於事實判斷既討論，係應該以另一D事實黎確立。我認為比較好既例子係檢驗下算命、星座、掌相等既可靠性黎做判斷。題外話：我係聽過一D由朋友畀既例子，都係指向人係有所謂命運(當然，我知道咩為之一個好既預言)，不過關於人係人生入面有冇任何或多或少既選擇權，我冇意見。(即係我鍾意黑色係唔係命定？我唔肯定)

好多時我地都會墮入以上既謬誤，就係因為事件引申既後果嚴重，所以就逃避現實，以上就係人唔肯面對「我地無選擇」呢個問題而引致既謬誤。一個思路清晰既人，係唔應該因為事件既嚴重性黎影響判斷，真就係真，假就係假，唔知就係唔知，總唔會因為一D我地唔願見到既情形而顛倒黑白是非，呢D係逃避現實既表現。