週末.....自由喇！

老竇老母去左新西蘭，我又可以享受下一個星期既自由。

同屋企人住得耐左就想搬出去住，不過有時佢地返香港，自己一個住得耐左又想同返佢地住，而家佢地有時返香港，有時返黎，o岩o岩中和左2種相反既意向。

星期六朝早車佢地去機場，晏晝出左去睇戲，今個月係西班牙電影節，揀左套講巴斯克分離主義既戲，講15個受害暫既家屬講出佢地感受既記錄片。套片麻麻，冇我想睇既野(例如巴斯克點解想獨立，西班牙政府有咩手段等等都冇講)，不過發覺個戲院就好Pro，D廣告有Taste，最後完場字幕完左先開燈，睇戲要咁先係尊重架嘛。

夜晚出左去Darling Harbour影相，不過影左成晚都係得3張滿意，其他好多都係有D震，可能曝光時間太耐啦，有風吹郁過腳架都未定，唔緊要啦，下次用返大少少光圈再黎過。

星期日就出左去睇World Press Photo展，有好多都好震撼，亦都話左畀我聽好多野，可能我睇報紙少喇，有D時事野我真係唔知，呢個影展係畀我認識下呢個世界既好機會。

夜晚就親自下廚(都好耐冇做過喇)，再睇舊戲Mad Max。呢套戲上個陣我都可能未出世，有後生既米路吉遜！套片就好暴力，不過又唔係血腥個隻，睇完去睇RottenTomato影評，竟然係100分？！我就唔係覺得咁好呀......遲D有機會打返影評啦。